योद्धाको गीतबारे बालेन : जीवित हुँदै ट्रिब्यूट दिनु भएकोमा मेरो जीवन सफल भो

News Summary

Generated by OK AI. Editorially reviewed.

योद्धाले नयाँ गीत 'अग्निपथ' काठमाडौं महानगरका मेयर तथा र्‍यापर बालेनप्रति समर्पित गरेका छन्।
बालेनले फेसबुकमा गीतको लिंक सेयर गर्दै 'मलाई थाह छैन म यो ट्रिब्यूटको लायक थिएँ कि थिइन' भनेका छन्।
योद्धाको गीत युट्युबमा ८ लाखभन्दा बढी पटक हेरिएको छ र बालेनले गीतलाई 'मेरो जीवन सफल भो' भनेका छन्।

काठमाडौं । यदि तपाईं नेपाली हिपहप संगीतलाई पछ्याउनुहुन्छ भने योद्धा पछिल्लो समयको चर्चित नाम हो । जेनजी पुस्तामा उनको संगीत सुन्नेहरू प्रशस्तै छन् ।

एकपछि अर्को हिट गीत ल्याइरहेका योद्धाले पछिल्लो गीतलाई भने काठमाडौं महानगरका मेयर तथा र्‍यापर बालेनप्रति समर्पित गरेका छन् ।

केही दिनअघि योद्धाले युट्युबमा सार्वजनिक गरेको नयाँ सांगीतिक भिडियो ‘अग्निपथ’ बालेनप्रति समर्पित छ । जसलाई, बालेनले पनि सामाजिक सञ्जालमा सेयर गर्दै खुसी ब्यक्त गरेका छन् ।

बालेनले फेसबुकमा गीतको लिंक सेयर गर्दै लेखेका छन्, ‘प्रिय योद्धा, मलाई थाह छैन म यो ट्रिब्यूटको लायक थिएँ कि थिइँन, हजुरको मायाको लागी आजिवन आभारी रहने छु !’

बालेनको जवाफमा योद्धाको प्रतिक्रिया छ, ‘दाइ यो त हाम्रो सम्मान र प्रशंसा देखाउने सानो प्रयास मात्र हो । तपाईंले जे गर्नुभएको छ, त्यहीबाट हामीलाई धेरै प्रेरणा मिल्छ ।’

युट्युबमा पनि बालेनले टिप्पणी गरेका छन् । उनी लेख्छन्, ‘मेरो भाइको लागि कुनै शब्द छैन । योद्धाको जय होस् । जीवित हुँदै यस्तो ट्रिब्यूट दिनु भएकोमा मेरो जीवन सफल भो ।’

योद्धाकै युट्युब च्यानलबाट सार्वजनिक गरिएको गीतलाई अहिलेसम्म ८ लाखभन्दा धेरै पटक हेरिएको छ ।