ओलीलाई भेट्न गुण्डु पुगे पोखरेल

News Summary

Generated by OK AI. Editorially reviewed.

नेकपा एमालेका वरिष्ठ उपाध्यक्ष ईश्वर पोखरेलले भक्तपुरको गुण्डुमा अध्यक्ष केपी शर्मा ओलीसँग भेट गरेका छन्।
पोखरेलले महाधिवेशनमा ओलीसँग भिड्ने तयारीमा समूह बनाएर उम्मेदवारी घोषणा गरिसकेका छन्।
गुण्डुमा महाधिवेशन प्रतिनिधि छनोट विवादबारे छलफल भएको छ र विवाद सुल्झाउन आग्रह गरिएको छ।

१८ मंसिर, काठमाडौं । नेकपा एमालेका वरिष्ठ उपाध्यक्ष ईश्वर पोखरेलले भक्तपुरको गुण्डु पुगेर अध्यक्ष केपी शर्मा ओलीसँग भेट गरेका छन् ।

११औं महाधिवेशन नजिकिरहेका बेला पोखरेलले अध्यक्ष ओलीलाई भेटेका हुन् ।

अध्यक्षमा उम्मेदवारी घोषणा गरेका पोखरेललाई सहमतिमा आउन ओली आग्रह गर्दै आएका छन् । तर, पोखरेलले भने समूह नै बनाएर महाधिवेशनमा ओलीसँग भिड्ने तयारीमा छन् ।

पोखरेलसँगै गुण्डु जानेमा उनको पक्षमा खुलेका नेताहरू छन् । उपाध्यक्षद्वय सुरेन्द्र पाण्डे, अष्टलक्ष्मी शाक्य, सचिव योगेश भट्टराई सहितका नेताले ओलीलाई भेटेका हुन् ।

बिहीबार गुण्डुमा महाधिवेशन प्रतिनिधि छनोटका क्रममा विभिन्न जिल्लामा भएको विवादबारे कुराकानी भएको छलफलमा सहभागी एक नेताले जानकारी दिए ।

अध्यक्ष ओली पक्षधरको खेमाले प्रतिनिधि छनोटमा एकलौटी गरेको पोखरेल पक्षका नेताहरूले गुनासो गरेका छन् ।

‘प्रतिनिधि छनोट विवादको विषयमा कुराकानी गर्न गएका थियौं, विवाद सुल्झाएर अघि बढौं भन्ने आग्रह अध्यक्षसामु राखेका छौं,’ ती नेताले भने ।