अर्जुननरसिंह केसीलाई समानुपातिक सूचीमा मैले राखेको हैन: गगन थापा

News Summary

Generated by OK AI. Editorially reviewed.

नेपाली कांग्रेसका महामन्त्री गगनकुमार थापाले नेता अर्जुननरसिंह केसीको नाम समानुपातिक सूचीमा राख्नुमा आफ्नो कुनै भूमिका नभएको बताएका छन्।
थापाले आफ्नो चाहनाविपरीत उक्त निर्णय गरिएको र 'मेरो अनुरोध र हर सम्भव प्रयास विपरितको निर्णय हो' भनेका छन्।
उनले केसीसँग आफू महामन्त्रीमा चुनाव भिडेको र समानुपातिक प्रणाली रोज्ने विषयमा मत भिन्नता रहेको पनि बताएका छन्।

१५ पुस, काठमाडौँ । नेपाली कांग्रेसका महामन्त्री गगनकुमार थापाले नेता अर्जुननरसिंह केसीको नाम समानुपातिक सूचीमा राख्नुमा आफ्नो कुनै भूमिका नभएको बताएका छन् ।

सामाजिक सञ्जाल फेसबुकमार्फत उनले आफ्नो चाहनाविपरीत उक्त निर्णय गरिएको बताएका हुन् ।

‘नेपाली कांग्रेसका नेता अर्जुननरसिंह केसीलाई मेरो प्रयासमा समानुपातिक सूचीमा राखिएको भन्ने हल्ला फैलाइएको रहेछ,’ उनले भनेका छन्, ‘म स्पष्ट पार्न चाहन्छु; यो मेरो चाहना विपरित हो। मेरो अनुरोध र हर सम्भव प्रयास विपरितको निर्णय हो ।’

पार्टीको राजनीतिमा केसीसँग आफू महामन्त्रीमा चुनाव भिडेको भन्दै उनले यसपटक अग्रज नेतालाई समानुपातिक प्रणाली रोज्ने विषयमा आफ्नो मत भिन्नता रहेको पनि बताएका छन् ।

‘मेरो र उहाँको आ-आफ्ना राजनीतिक दृष्टिकोण र निर्णयहरू हुन्छन्, कहिले मिल्छन्, कहिले बाझिन्छन्,’ उनले अगाडि लेखेका छन्, ‘जसरी कुनै बेला हाम्रो राजनीतिक दृष्टिकोण र प्राथमिकता मिलेन र एक अर्कासंग पार्टीको महामन्त्री पदका लागि फरक एजेन्डा र सङ्कल्पसहित चुनाव लड्यौं। यसपटक पनि पार्टीका अग्रज नेताले समानुपातिक प्रणाली रोज्ने वा नरोज्ने विषयमा हाम्रो मत भिन्नता रह्यो ।’