‘मिसेस वर्ल्ड’ मा नेपालले उपविजेतालाई अमेरिका पठाउने, विजेता पन्त असमर्थ भएको दाबी

News Summary

Generated by OK AI. Editorially reviewed.

सञ्जु भट्टले अमेरिकाको लस-भेगासमा हुने मिसेस वर्ल्ड २०२६ मा नेपालको प्रतिनिधित्व गर्ने भएकी छन्।
रक्षा पन्त व्यक्तिगत तथा व्यवसायिक प्रतिबद्धताको कारण अमेरिका जान असमर्थ भएकाले भट्टले उपाधि विजेताको ठाउँमा प्रतिनिधित्व गर्ने बताइएको छ।
भट्टले व्यक्तित्व विकास, र्‍याम्प वाक, पब्लिक स्पिकिङ, फिटनेस र यूमिडसम्बन्धी प्रशिक्षण लिइरहेकी छन् र प्रतियोगिता जनवरी २७ देखि सुरु हुनेछ।

काठमाडौं । अमेरिकाको लस-भेगासमा हुने विवाहित महिलाको सौन्दर्य प्रतियोगिता ‘मिसेस वर्ल्ड २०२६’ मा नेपालको प्रतिनिधित्व सञ्जु भट्टले गर्ने भएकी छन् । आयोजक संस्था रिबन इन्टरनेटमेन्टले मंगलबार प्रेसमिट गर्दै यसबारे जानकारी दिएको हो ।

उपाधि विजेता रक्षा पन्तको ठाउँमा भट्टले प्रतिनिधित्व गर्ने जनाइएको हो । चर्चित अभिनेत्री सुरक्षा पन्तकी बहिनी समेत रहेकी रक्षाले व्यक्तिगत तथा व्यवसायिक प्रतिबद्धताको कारण अमेरिका जान असमर्थ भएको दाबी प्रेसमिटमा गरिएको थियो ।

रक्षा र सञ्जु एकसाथ प्रेसमिटमा सहभागी थिए । ३० कात्तिकमा आयोजित ग्रान्ड फिनालेमा पन्तले ‘मिसेस नेपाल वर्ल्ड २०२५’ को उपाधि जितेकी थिइन् । भट्टलाई ‘मिसेस नेपाल इन्टरनेसनल’ घोषित गरिएको थियो ।

मिसेस नेपाल इन्टरनेसनल विजेताले सिंगापुरमा हुने ‘मिसेस इन्टरनेसनल’ मा भाग लिने उक्त अवसरमा बताइएको थियो ।

भट्टको आत्मविश्वास, व्यक्तित्व, सामाजिक चेतना तथा अन्तर्राष्ट्रिय मञ्चमा नेपालको पहिचान प्रस्तुत गर्ने क्षमताका आधारमा उनलाई मिसेस वल्र्डमा प्रतिनिधित्व गराउने निर्णय गरिएको विज्ञप्तिमा उल्लेख छ ।

प्रतियोगिताको तयारीस्वरूप भट्टले व्यक्तित्व विकास, र्‍याम्प वाक, पब्लिक स्पिकिङ, फिटनेस र यूमिडसम्बन्धी प्रशिक्षण लिइरहेकी छन् । नेसनल कस्ट्युमको डिजाइनलाई आईआईएफटी नेपालले डिजाइन गरिरहेको छ ।

‘मिसेस वर्ल्ड २०२६’ को २७ जनवरीदेखि सुरु हुनेछ । ग्रान्ड फिनाले २९ जनवरीलाई तय छ । लस भेगासको वेस्ट-गेट रिसोर्ट एन्ड क्यासिनोमा कार्यक्रम हुनेछ ।