विराटनगर महानगरपालिकाले कटौती गर्‍यो २० प्रतिशत बजेट

News Summary

Generated by OK AI. Editorially reviewed.

विराटनगर महानगरपालिकाले चालु आर्थिक वर्षका लागि विनियोजित बजेटमा २० प्रतिशत कटौती गर्ने निर्णय गरेको छ।
नगरसभाको १७ औँ अधिवेशनले भदौको जेनजी आन्दोलन र आन्तरिक आय मन्दीका कारण बजेट समायोजन गरेको हो।
भदौ २३ र २४ गतेको आन्दोलनमा प्रशासनिक भवनसहित १३ वडा कार्यालयमा आगजनी हुँदा झण्डै १ अर्ब रुपैयाँ क्षति भएको छ।

२४ पुस, विराटनर । विराटनगर महानगरपालिकाले चालु आर्थिक वर्षका लागि विनियोजित बजेटमा २० प्रतिशत कटौती गर्ने गरेको छ ।

बिहीबार सम्पन्न नगरसभाको १७ औँ अधिवेशनले गत भदौमा भएको ‘जेनजी आन्दोलन’ बाट सिर्जित परिस्थिति र आन्तरिक आयमा देखिएको मन्दीका कारण बजेट समायोजन गरेको हो ।

चालु आर्थिक वर्षका लागि ४ अर्ब ४० लाख रुपैयाँ आयको अनुमान गरिएको थियो । पुस १५ गतेसम्म १ अर्ब १५ करोड ८४ लाख रुपैयाँ अर्थात् २८ दशमलव ९३ प्रतिशत मात्र यथार्थ आय भएको छ ।

आन्तरिक राजस्वतर्फ १ अर्ब ४० करोडको लक्ष्य राखिएकोमा १९ करोड ८५ लाख रुपैयाँ मात्र संकलन भएको छ ।

भदौ २३ र २४ गतेको आन्दोलनका क्रममा महानगरको प्रशासनिक भवनसहित १३ वटा वडा कार्यालयमा भएको आगजनीबाट झण्डै १ अर्ब रुपैयाँ बराबरको भौतिक क्षति भएको थियो ।

उपमेयर शिल्पा निराला कार्कीका अनुसार बजेट कटौती वडास्तरीय बाहेकका क्षेत्रगत तथा नगरस्तरीय योजनाहरूमा गरिएको छ ।