घोडाचढी सिक्दै सरोज, केकी, विजयसहितका कलाकार

News Summary

Generated by OK AI. Editorially reviewed.

चलचित्र विकास बोर्डले दक्षता अभिवृद्धि वर्ष २०८२ को अवसरमा २४ माघदेखि एक हप्ते घोडाचढी तालिम सञ्चालन गर्ने भएको छ।
तालिममा सरोज खनाल, दीपाश्री निरौला, विजय बराल, केकी अधिकारी लगायतका कलाकार सहभागी हुने बोर्डले जनाएको छ।
बोर्ड अध्यक्ष डीसीले भने, 'घोडाचढी जस्तो सीप अब वैकल्पिक होइन, अनिवार्य बन्दै गएको छ' र यसले नेपाली फिल्मलाई अन्तर्राष्ट्रियस्तरमा उकास्न मद्दत गर्ने विश्वास लिएको छ।

काठमाडौं । चलचित्र विकास बोर्डले दक्षता अभिवृद्धि वर्ष २०८२ को अवसरमा एक हप्ते घोडाचढी तालिम सञ्चालन गर्ने भएको छ । २४ माघदेखि सुरु हुने उक्त तालिममा नेपाली फिल्मका चर्चित कलाकारको सहभागिता रहने बोर्डले जनाएको छ ।

ऐतिहासिक, पौराणिक, एक्सन तथा साहसिक कथावस्तुका फिल्मको निर्माणमा आवश्यक पर्ने सीप विकास गर्ने उद्देश्यले आयोजना गरिएको यो तालिम कलाकार र फिल्म क्षेत्रलाई महत्वपूर्ण हुने बोर्डले जनाएको छ ।

तालिममा पाका अभिनेता सरोज खनालदेखि निर्देशक तथा अभिनेत्री दीपाश्री निरौलासम्म छन् । कलाकार विजय बराल, केकी अधिकारी, प्रमोद अग्रहरि, रविन्द्रसिंह बानियाँ, नाजिर हुसेन लगायतका कलाकार पनि तालिममा सहभागी हुनेछन् ।

तालिमबारे बोर्ड अध्यक्ष डीसीले भने, ‘नेपाली चलचित्रमा ऐतिहासिक, पौराणिक र एक्सन विषयका कथावस्तु बढ्दै गएको सन्दर्भमा घोडाचढी जस्तो सीप अब वैकल्पिक होइन, अनिवार्य बन्दै गएको छ । कलाकार र स्टन्ट आर्टिस्टलाई सुरक्षित, अनुशासित र व्यावसायिक बनाउने उद्देश्यले यो तालिम सुरु गरिएको हो ।’

यसले फिल्मको गुणस्तरमा वृद्धि गर्नुको साथै नेपाली सिनेमालाई अन्तर्राष्ट्रियस्तरमा उकास्न मद्दत गर्ने जनाइएको छ । तालिमले सीप, सुरक्षा र उत्पादन गुणस्तरको दृष्टिले नेपाली फिल्मलाई नयाँ चरणमा प्रवेश गराउने विश्वास बोर्डले लिएको छ ।