यो चिनियाँ एआईसँग हलिउड किन डराउँदैछ ?

टिकटक बनाउने चिनियाँ कम्पनी बाइटडान्सले विकास गरेको नयाँ आर्टिफिसियल इन्टेलिजेन्स (एआई) मोडललाई लिएर अहिले हलिउड चिन्तित भएको छ । सिड्यान्स २.० नाम गरेको उक्त नयाँ एआई मोडलको कार्य क्षमतालाई लिएर हलिउड स्तब्ध बनेको हो ।

अहिले बजारमा प्रम्प्ट (निर्देशन) दिएकै आधारमा आवाज, दृश्य बनाउन सक्ने एआई मोडलहरू राम्रै संख्यामा छन् । यो मोडलले भने प्रयोगकर्ताले दिने निर्देशनहरूका आधारमा साउन्ड इफेक्ट, संवाद र दृश्यसहित सिनेमा बनाउँछ ।

सामाजिक सञ्जालमा सिड्यान्सले बनाएका स्पाइडर म्यान, डेडपुल जस्ता पात्रहरूको भिडियोहरू भाइरल छ । जसलाई लिएर यता हलिउडका ठूला स्टुडियो डिज्नी र प्यारामाउन्टले भने बाइटडान्सले प्रतिलिपि अधिकार उल्लंघन गरेको आरोप लगाएका छन् ।

सिड्यान्स के हो र किन यति धेरै चर्चा ?

सिड्यान्स सन् २०२५ को जुनमा सामान्य रूपमा सार्वजनिक जेनेरेटिभ एआई मोडल हो । तर आठ महिनापछि आएको यसको दोस्रो संस्करणले भने ठूलो हलचल पैदा गरेको छ ।

धेरैले यसले दिने नतिजा सिनेमाकै स्तरको रहेको भनी प्रतिक्रिया दिइरहेका छन् । यसको नतिजा हाल अमेरिका सहितका पश्चिमा देशहरूको एआई मोडलभन्दा धेरै उत्कृष्ट भएको समेत भनिएको छ ।

यसकारण उद्योगका कतिपयले सिड्यान्सलाई भिडियो उत्पादन गर्ने प्रविधिको विकासमा एउटा नयाँ अध्याय मान्ने पनि बताएका छन् । यो टुलले विशेषज्ञता हासिल गरेको कुनै सिनेमेटोग्राफरले दृश्य खिचे जस्तै फिल्म बनाउने दावी गरिएको छ ।

यद्यपि सिड्यान्स अहिले प्रतिलिपि अधिकारका मुद्दाहरूमा फसेको छ । जुन कुनै पहिलो घटना भने होइन । विशेषत: हलिउडले प्रतिलिपि अधिकार सुरक्षित गरिएका पात्रहरूको प्रयोगलाई लिएर कानूनी प्रश्न उठाएको हो । लोकप्रिय एनिमे पात्रहरूका एआई भिडियोहरू भाइरल भएपछि जापानले समेत प्रतिलिपि अधिकार उल्लंघन भए/नभएको हेरिरहेको बताइएको छ ।

सन् २०२३ मा न्युयोर्क टाइम्सले ओपनएआई र माइक्रोसफ्टलाई उनीहरूको एआई मोडल तालिम दिन आफ्ना लेखहरू अनुमति बिना प्रयोग गरेको भन्दै मुद्दा दायर गरेको थियो । रेडिटले पनि गत वर्ष पर्प्लेक्सिटीलाई प्रयोगकर्ताका पोस्टहरू अवैध रूपमा प्रयोग गरेको दाबी गर्दै मुद्दा हालेको थियो ।

तर कतिपय कम्पनीहरूले भने एआई कम्पनीहरूसँग सम्झौता समेत गरिरहेको छ । जस्तो, डिज्नीले ओपनएआईको सोरासँग एक अर्ब डलर बराबरको सम्झौता गरेको छ । यो सम्झौतापछि सोराले स्टार वार्स, पिक्सार र मार्भलका पात्रहरूलाई एआई तालिमका लागि प्रयोग गर्न सक्छ ।

प्रतिलिपिबाहेक हलिउडलाई अर्को डर भनेको साना फिल्ममेकरहरूलाई सहज हुने कुरो हो । सिनेमा स्तरको दृश्य बनाउन सक्ने भएपछि सबैले सजिलै छोटा फिल्म तथा माइक्रो-ड्रामा बनाउन सक्छन् । त्यस्तै एआईले कम बजेटबाटै साइ-फाई, ऐतिहासिक नाटक र एक्सन जस्ता ठूला विधाहरूमा सहयोग पुर्‍याउन सक्छ।

के चीन प्रविधिमा अगाडि बढ्दैछ ?

सिड्यान्सले फेरि एकपटक चिनियाँ प्रविधिलाई चर्चाको केन्द्रमा ल्याएको छ । गत वर्ष मात्रै च्याटबट डीपसीक एकाएक चर्चामा आएको थियो । यसले एप्पलको अमेरिकी स्टोरमा च्याटजीपीटीलाई पछाडि पार्दै सबैभन्दा धेरै डाउनलोड हुने एप बनेको थियो ।

पछिल्लो समयम बेइजिङले एआई र रोबोटिक्सलाई आफ्नो आर्थिक रणनीतिको केन्द्रमा राखेको छ । अमेरिकालाई उछिन्न चीनले कम्प्युटर चिप उत्पादन, अटोमेसन र जेनेरेटिभ एआईमा ठूलो लगानी गरिरहेको छ । यसले गर्दा छोटो समयमा नै चिनियाँ एआई टुल्सहरू चर्चामा आइरहेका हुन् ।

बीबीसीबाट