२०८२ फागुन १४ गते १८:३१ 
News Summary
Generated by OK AI. Editorially reviewed.- दक्षिण अफ्रिकाले आईसीसी टी-२० विश्वकप २०२६ सुपर ८ मा वेस्ट इन्डिजलाई ९ विकेटले पराजित गरेको छ।
- कप्तान एइडेन मार्क्रमले ४६ बलमा अविजित ८२ रन बनाएर टीमलाई १६.१ ओभरमा लक्ष्य पूरा गराएका छन्।
- वेस्ट इन्डिजले २० ओभरमा ८ विकेट गुमाएर १७६ रन बनाएको थियो, लुङ्गी एङ्गिडीले ३ विकेट लिए।
१४ फागुन, काठमाडौं । कप्तान एइडेन मार्क्रमको शानदार ब्याटिङमा आईसीसी टी-२० विश्वकप २०२६ अन्तर्गत सुपर ८ को खेलमा दक्षिण अफ्रिकाले वेस्ट इन्डिजमाथि सहज जित हासिल गर्दै सेमिफाइनलको नजिक पुगेको छ ।
बिहीबार अहमदाबादमा भएको खेलमा दक्षिण अफ्रिकाले वेस्ट इन्डिजलाई ९ विकेटले पराजित गरेको हो । वेस्ट इन्डिजले दिएको १७७ रनको लक्ष्य दक्षिण अफ्रिकाले १६.१ ओभरमा १ विकेटको क्षतिमा पूरा गरेको हो ।
कप्तान एइडेन मार्क्रमले ४६ बलमा ७ चौका र ४ छक्कासहित अविजित ८२ रन बनाए भने रायन रिकेल्टनले अविजित ४५ रन बनाए । क्विन्टन डिककले आउट हुनुअघि ४७ रन बनाए ।
वेस्ट इन्डिजका रस्टन चेसले एकमात्र विकेट लिए ।
त्यसअघि टस हारेर पहिले ब्याटिङको निम्तो पाएको वेस्ट इन्डिजले २० ओभरमा ८ विकेट गुमाएर १७६ रन बनाएको थियो । रोमारियो शेपहर्डले अविजित ५२ रन बनाए भने जेसन होल्डरले ४९ रन बनाए ।
८३ रनमा ७ विकेट गुमेको अवस्थाबाट शेपहर्ड र होल्डर मिलेर ८९ रनको साझेदारी गरेका थिए । ब्रान्डन किङले २१ रन बनाए ।
दक्षिण अफ्रिकाका लागि लुङ्गी एङ्गिडीले ३ विकेट लिँदा कगिसो रबाडा र कर्बिन बोशले २-२ विकेट लिए ।
प्रतियोगितामा दक्षिण अफ्रिका अझै पनि अपराजित छ भने वेस्ट इन्डिजले पहिलो हार बेहोरेको छ ।
अब आजै बेलुका हुने भारत र जिम्बाबेबीचको खेलमा भारत विजयी भएमा दक्षिण अफ्रिकाको आजै सेमिफाइनलमा स्थान पक्का हुनेछ ।
प्रतिक्रिया 4