ग्लोबल आईएमई बैंकले विदेशमा रहेकालाई एकद्वार प्रणालीबाट सेवा दिने

News Summary

Generated by OK AI. Editorially reviewed.

ग्लोबल आईएमई बैंकले विदेशमा बसोबास गरिरहेका नेपालीका लागि ‘नन् रेसिडेन्ट तथा ओभरसिज बैंकिङ विभाग’ स्थापना गरेको छ।
बैंकका अध्यक्ष चन्द्रप्रसाद ढकालले बिहीबार उक्त विभागको औपचारिक शुभारम्भ गरेका छन्।
यस विभागले विदेशमा रहेका नेपालीलाई बैंक खाता खोल्ने, कर्जा दिने र पूँजीबजार सेवा उपलब्ध गराउनेछ।

२८ फागुन, काठमाडौं । ग्लोबल आईएमई बैंकले विदेशमा बसोबास गरिरहेका नेपालीका लागि डेडिकेटेड र पूर्ण बैंकिङ सेवा उपलब्ध गराउने उद्देश्यले ‘नन् रेसिडेन्ट तथा ओभरसिज बैंकिङ विभाग’ स्थापना गरेको छ ।

बिहीबार बैंकमा आयोजित एक विशेष कार्यक्रमबीच बैंकका अध्यक्ष तथा नेपाल उद्योग वाणिज्य महासंघका अध्यक्ष चन्द्रप्रसाद ढकालले उक्त विभागको औपचारिक शुभारम्भ गरे ।

नेपालमै पहिलो पटक सुरु गरिएको यस विभागमार्फत बैंकले आफ्नो अन्तर्राष्ट्रिय उपस्थिति, प्रविधि र सेवा संयन्त्रलाई एकीकृत गर्दै विश्वभर रहेका ग्राहकलाई एकद्वार प्रणालीमार्फत् सेवा प्रदान गर्नेछ ।

बैंकको यस विभागबाट विदेशमा रहेका नेपालीलाई सम्पूर्ण बैंकिङ सेवा (बैंक खाता खोल्ने, कर्जा प्रदान गर्ने, ट्रान्जेक्सन बैंकिङ सम्बन्धी सेवा, पूँजीबजार तथा पोर्टफोलियो व्यवस्थापन लगायतका सेवा) उपलब्ध गराउने छ ।

‘विदेशमा रहेका नेपालीलाई सेवा उपलब्ध गराउन ग्राहक सेवा नम्बर, इमेल, वैदेशिक प्रतिनिधि कार्यालय तथा काठमाडौंको नक्सालस्थित यस विभागको कार्यालयमार्फत विभिन्न सेवाहरु उपलब्ध हुनेछ’ बैंकले एक विज्ञप्तिमा भनेको छ ।

सन् २००७ मा स्थापना भएदेखि ग्लोबल आइएमई बैंकले विश्वभर रहेका नेपाली आप्रवासी तथा डायस्पोराको सेवालाई निरन्तर प्राथमिकता दिँदै बैंकिङ सेवा प्रदान गर्दै आइरहेको छ ।