अपर तमोर हाइड्रोका एक कामदार मृत फेला

News Summary

Generated by OK AI. Editorially reviewed.

ताप्लेजुङको फक्ताङलुङ गाउँपालिका–५ मा कार्यरत ४० वर्षीय यमराज लिम्बू मृत अवस्थामा फेला परेका छन्।
लिम्बू फागुन ८ गते घर जान्छु भनेर हिँडेका थिए र चैत १ गते खोजतलासका लागि निवेदन परेको थियो।
उनको शव फक्ताङलुङ गाउँपालिका–२ को मेथेन खोलमा सडेगलेको अवस्थामा फेला परेको छ र पोष्टमार्टमका लागि जिल्ला अस्पताल ल्याइएको छ।

१६ चैत, ताप्लेजुङ । ताप्लेजुङको फक्ताङलुङ गाउँपालिका–५ मा रहेको अपर तमोर हाइड्रो कम्पनीमा कार्यरत एक युवक मृत अवस्थामा फेला परेका छन् ।

तेह्रथुमको म्याङ्लुङ नगरपालिका–१, गैरी गाउँका ४० वर्षीय यमराज लिम्बू मृत अवस्थामा फेला परेको जिल्ला प्रहरी कार्यालय ताप्लेजुङले जनाएको छ ।

गत फागुन ८ गते घर जान्छु भनेर हिँडेका लिम्बू हालसम्म सम्पर्कमा नआएको भन्दै चैत १ गते खोजतलासका लागि हुलियासहित निवेदन परेको थियो ।

सोही आधारमा खोजी कार्य गर्दै जाँदा आइतबार फक्ताङलुङ गाउँपालिका–२ मा मेथेन खोलमा सडेगलेको अवस्थामा लिम्बूको शव फेला परेको ताप्लेजुङका प्रहरी निरीक्षक जटाशङ्कर यादवले जानकारी दिए ।

घटनास्थलमा पुगेर अनुसन्धान गर्ने क्रममा मृतकको बायाँ हातमा रहेको ट्याटुका आधारमा शवको पहिचान गरिएको प्रहरीले जनाएको छ ।

शव पोष्टमार्टमका लागि जिल्ला अस्पताल ताप्लेजुङमा ल्याइएको छ भने घटनाबारे थप अनुसन्धान भइरहेको प्रहरीले जनाएको छ ।