सर्वेक्षणको रिपोर्ट : नेपालसँग जोडिएको सिक्किममा महिलाको तौल धेरै बढ्यो

नेपालसँग सीमा जोडिएको भारतको सिक्किम राज्यमा मोटोपनको समस्या धेरै बढेको सर्वेक्षणले देखाएको छ । विशेष गरी सिक्किमका महिलाको तौल पछिल्ला वर्षमा धेरै बढेको पाइएको छ ।

भारतको केन्द्रीय स्वास्थ्य मन्त्रालय अन्तर्गतको इन्टरनेशनल इन्स्टिच्युट फर पपुलेशन साइन्सेस (आईआईपीएस) ले गरेको सर्वेक्षणमा यस्तो देखिएको हो ।

2०२३-२४ मा गरिएको यस सर्वेक्षणलाई ‘नेशनल फेमिली हेल्थ सर्वे-६’ नाम दिइएको छ । यसअघि २०१९–२०२१ मा ‘नेशनल फेमिली हेल्थ सर्वे-५’ सम्पन्न गरिएको थियो ।

पाचौँ सर्वेको तुलनामा यो सर्वेमा भारतका थुप्रै राज्यमा बडी मास इन्डेक्स(बीएमआई) धेरै बढेको पाइएको छ ।

यसमा देशभरबाट ६ लाख ७९ हजार २३८ परिवारका व्यक्तिलाई समेटिएको थियो । जसमा ७ लाख १६ हजार ३९७ महिला र १ लाख ९७७ पुरुषको बीएमआई अध्ययन गरिएको थियो ।

भारतका १५–४९ उमेर समूहका महिलामा ३ मध्ये १ जनामा औषत भन्दा बढी तौल रहेको यो सर्वेले देखाएको छ । भारतका ३०.७ प्रतिशत महिलामा चाहिने भन्दा बढी तौल रहेको देखिएको छ । पाचौं सर्वेमा २४ प्रतिशत महिलामा बढी तौल देखिएको थियो ।

यही उमेर समूहका पुरुषको अवस्था हेर्दा ५औं सर्वेमा २२.९ प्रतिशतमा बढी तौल देखिएको थियो । अहिले २७.३ प्रतिशत पुरुषमा बढी तौल रहेको पाइएको छ ।

नेपालसँग सिमान जोडिएको र अधिकांश नेपाली भाषीको बसोबास रहेको सिक्किमका महिलामा सबैभन्दा बढी मोटोपन वृद्धि भएको यस सर्वेले देखाएको छ ।

सर्वेको रिपोर्टअनुसार सिक्किमका ४७.५ प्रतिशत महिलामा हुनुपर्ने भन्दा बढी तौल देखियो । पाचौं सर्वेमा बढी तौल हुने महिला ३४.८ प्रतिशत मात्रै थिए । बीचम बढी तौल हुने महिलाको संख्यामा १२.७ प्रतशितले वृद्धि भएको सर्वेमा देखिएको छ । यो दर भारतका अन्य सबै राज्यमा भन्दा धेरै हो ।

यसपछि आन्द्र प्रदेशमा महिलामा मोटोपनको वृद्धिदर ११.६ प्रतिशत देखिएको छ ।

मोटोपन वृद्धि हुनेमा पुरुषहरूतर्फ भने सिक्किम अगाडि देखिएको छ । आन्द्र प्रदेशमै पुरुषहरू धेरै मोटाएको देखिएको छ । आन्द्र प्रदेशमा आवश्यकता भन्दा बढी तौल हुने पुरुषको संख्यामा १०.४ प्रतिशत वृद्धि भएको छ । गुजरात र महाराष्ट्रपछि सिक्किम चौथो नम्बरमा रहेको छ । सिक्किममा बढी तौल हुने पुरुषको संख्यामा ६.३ प्रतिशतले वृद्धि भएको सर्वेक्षणले देखाएको छ ।

दिल्लीमा भने पुरुषहरुले तौल घटाउको सर्वेक्षणको तथ्यांकले देखाएको छ । आवश्यकता भन्दा बढी तौल हुने पुरुषको संख्या अघिल्लो सर्वेको तुलनामा ३.२ प्रतिशतले घटेको यो सर्वेले देखाएको छ ।

विशेषगरी सिक्किमबासी र थुप्रै नेपाली समुदायबीच साँस्कृतिक तथा सामाजिक रुपमा समानता देखिन्छ । जीवनशैलीहरू पनि समान खालका हुन्छन् ।

यस खालको सर्वेक्षण नभए पनि नेपालमा समेत पछिल्ला वर्षहरूमा मोटोपनको समस्या तीब्र रूपमा बढिरहेको विभिन्न अध्ययनहरुले देखाउने गरेका छन् ।