२०८३ साउन २९ गते ११:०२ 
News Summary
Generated by OK AI. Editorially reviewed.- पेरिसमा जारी पब्जी मोबाइल विश्वकपको ग्रान्ड फिनाले आजदेखि सुरु हुँदै छ ।
- नेपालको होरा ईस्पोर्ट्स सहित १६ टोली उपाधिका लागि प्रतिस्पर्धा गर्दै छन् ।
- ग्रान्ड फिनालेको विजेताले पाँच लाख अमेरिकी डलर पुरस्कार प्राप्त गर्नेछ ।
२९ साउन, काठमाडौं । फ्रान्सको पेरिसमा जारी ईस्पोर्ट्स विश्वकप अन्तर्गत पब्जी मोबाइल विश्वकपको ग्रान्ड फिनाले आजदेखि सुरु हुँदैछ । फाइनलमा नेपालको होरा ईस्पोर्ट्स सहित १६ टोली भिड्दै छन् ।
होरा समूह चरणबाट सोझै ग्रान्ड फिनालेमा प्रवेश गरेको थियो । गत आइतबार सम्पन्न खेलहरूपछि समूह ‘बी’ का १६ टिमहरूमध्ये शीर्ष ५ मा पर्दै होरा सोझै फाइनलमा पुगेको थियो ।
सो क्रममा होराले एक चिकेन डिनरसहित कुल ९८ अंकका साथ चौथो स्थानमा फिनिस गर्दै फाइनल पुगेको हो । अब ३ दिनसम्म चल्ने फाइनलमा होराले अन्य १५ टिमहरूसँग प्रतिस्पर्धा गर्नेछ ।
समूह ‘बी’ बाट भाइटालिटी सर्वाधिक १४८ अंकका साथ फाइनलमा पुग्दा आईडीए, एसटुजी र गडलाइक पनि होरासँगै सोझै फाइनलमा पुगेका थिए । त्यसअघि समूह ‘ए’ बाट पाकिस्तानको फोर थ्राइभसँगै भारतको ओरानगुटान, मंगोलियाको अउरोरा, भियतनाम/सिंगापुरको टिम फ्ल्यास र मिडल इस्टको निग्मा ग्यालेक्सी शीर्ष पाँचमा रहँदै फाइनलमा पुगेका थिए ।
समूह चरणबाट आएका १० टोली र सर्भाइभल स्टेजबाट आएका ६ टोलीले फाइनल खेल्ने छन् । सर्भाइभल स्टेजबाट तियान्बा, अलुला क्लब, एनएस रेडफोर्स, फ्युरिया, युएलएफ ईस्पोर्टंस र ईएरेना फाइनलमा प्रवेश गरेका छन् ।
आफ्नो समूहमा चौथो भएको होराले ५७ हजार ५०० पुरस्कार पनि पक्का गरेको छ । अब ग्रान्ड फिनाले करौडौं डलर पुरस्कार राशी छ । ग्रान्ड फिनालेको विजेताले ५ लाख अमेरिकी डलर पुरस्कार पाउनेछ ।
पब्जी मोबाइलको ग्रान्ड फिनालेमा प्रतिस्पर्धा गर्ने १६ वटै टोलीले नगद पुरस्कार पाउनेछन् । जसमा च्याम्पियन बन्ने टोलीले ५ लाख अमेरिकी डलर प्राप्त गर्नेछ र उपविजेताले २ लाख ५० हजार डलर र तेस्रो हुनेले १ लाख ५० हजार डलर हात पार्नेछ ।
यस्तै चौथोले १ लाख २० हजार डलर, पाँचौले १ लाख डलर, छैटौंले ९० हजार डलर, सातौंले ८० र आठौंले ७० हजार डलर प्राप्त गर्नेछन् । नवौ देखि १६औं सम्म हुनेले क्रमश: ६० हजार, ५५ हजार, ५० हजार, ४५ हजार, ४० हजार, ३५ हजार, ३० हजार र २५ हजार डलर पाउनेछन् ।
प्रतिक्रिया 4