पूर्वडीएसपीलाई दुर्व्‍यवहार गरेको आरोपमा एकजना पक्राउ

३१ वैशाख, काठमाडौं । नेपाल प्रहरीका पूर्वडीएसपी केपी शर्मा पन्थीलाई दुर्व्‍यवहार गरेको आरोपमा प्रहरीले एकजना पक्राउ गरेको छ ।

काठमाडौंको पशुपति क्षेत्रमा अर्घाखाँची घर भएका पूर्वडीएसपी पन्थीलाई बाँधेर जुत्ताको माला लगाएको आरोपमा एक जनालाई प्रहरीले पक्राउ गरेको हो।

पक्राउ परेका व्यक्तिलाई प्रहरी वृत्त गौशालामा राखेर अनुसन्धान गरिएको जिल्ला प्रहरी परिसर काठमाडौंका एसपी तथा प्रवक्ता नवराज अधिकारीले बताए ।

पन्थीलाई युवाहरुको एक समूहले बाँधेर जुत्ताको माला लगाएको पाइएको छ ।

उनका अनुसार घटना केही दिन अघिको हो । जाहेरीकर्ता पन्थी पूर्वडीएसपी रहेको समेत पाइएको प्रहरीले जनाएको छ ।

प्रहरीको प्रारम्भिक अनुसन्धान अनुसार दुर्गा प्रसाईंका समर्थकहरुले पन्थीलाई जुत्ताको माला लगाएको पाइएको हो । प्रसाईंको आलोचना गरेको भन्दै जुत्ताको माला लगाएको पीडित पन्थीले प्रहरी समक्ष बताएका छन् ।

घटनामा संलग्न रहेको आरोपमा सोमबार मात्रै एक जना पक्राउ परेका छन् । अन्य व्यक्तिको खोजी भइरहेकाले प्रहरीले थप विवरण सार्वजनिक गरेको छैन ।