ओसाका वर्ल्ड एक्स्पोमा नेपालको बेइज्जत भयो : शिशिर खनाल

रास्वपा सांसद शिशिर खनाल । फाइल फोटो

News Summary

Generated by OK AI. Editorially reviewed.

नेपालले ओसाका वर्ल्ड एक्स्पोमा आफ्नो प्रदर्शनी कक्ष समयमा निर्माण गर्न नसक्दा राष्ट्रिय प्रतिष्ठामा नकारात्मक प्रभाव पारेको रास्वपा सांसद शिशिर खनालको भनाइ छ ।
प्रतिनिधि सभाको बैठकमा बोल्दै सांसद खनालले सरकारको अकर्मण्यता र भुक्तानी विवादका कारण नेपालको प्रदर्शन अवरोधमा भएको बताए ।
अन्तर्राष्ट्रिय मञ्चमा नेपालको कला, संस्कृति र पर्यटनको प्रचारप्रसार गर्न नसकिएको भन्दै उनले नेपाल सरकारको ध्यानाकर्षण गराए ।

१ जेठ, काठमाडौं । राष्ट्रिय स्वतन्त्र पार्टी (रास्वपा)का सांसद शिशिर खनालले ओसाका वर्ल्ड एक्स्पोमा नेपालको बेइज्जत भएको टिप्पणी गरेका छन् । बिहीबार प्रतिनिधि सभाको बैठकमा बोल्दै उनले यस्तो टिप्पणी गरेका हुन् ।

जापानको एक पत्रिकाले ‘एक्स्पोमा सहभागी मुलुकहरूमध्ये नेपाल एकमात्र त्यस्तो देश हो जसले अझै आफ्नो प्रदर्शनी कक्ष खोलेको छैन र निर्माण कार्य जनवरीदेखि रोकिएको छ’ भनेर समाचार लेखेको भन्दै खनालले सरकारको ध्यानाकर्षण गराए ।

जापानका सञ्चारमाध्यमहरूमा नेपालको लाजमर्दो अवस्थाबारे समाचार प्रकाशित भएको भन्दै उनले यसबाट नेपालको राष्ट्रिय प्रतिष्ठामा गम्भीर आँच पुगेको बताए ।

‘समाचारहरूका अनुसार, नेपालले बनाउनु पर्ने पेभेलियन निर्माण कार्य समयमा सम्पन्न हुन नसकेर अलपत्र परेको छ’ पूर्वमन्त्री समेत रहेका खनालले भने, ‘भुक्तानी विवाद र सरकारी अकर्मण्यताका कारण निर्माण रोकिएको खबरले अन्तर्राष्ट्रिय स्तरमै नेपालको बेइज्जत भएको छ ।’

जापानको ओसाकामा ‘ओसाका वर्ल्ड एक्स्पो २०२५’ आयोजना भइरहेको छ । त्यहाँ विश्वका १६० भन्दा बढी राष्ट्रहरूले आ–आफ्नो पहिचान, प्रगति र सम्भावनाहरू प्रदर्शन गरिरहेका छन् ।

करिब २ करोड ८० लाखभन्दा बढी व्यक्तिहरुले भ्रमण गर्ने अपेक्षा गरिएको उक्त एक्स्पो सन् २०२५ अप्रिल १३ देखि अक्टोबर १३ सम्म चल्नेछ ।

यति महत्वपूर्ण अन्तर्राष्ट्रिय मञ्चमा नेपालले आफ्नो कला, संस्कृति, पर्यटन र लगानीका अवसरहरू प्रस्तुत गरेर विश्वको ध्यानाकर्षित गर्ने सुनौलो अवसर भए पनि त्यस्तो हुन नसकेको उनले बताए ।

यस्तो संवेदनशील विषयमा नेपाल सरकारको तुरुन्त ध्यान जानुपर्ने खनालले बताए ।