मुगुबाट सगरमाथा : अक्कलको सफल आरोहण

७ जेठ,  बार्सिलोना । २०२५ मे २०, बिहान ८:५८ बजे।धर्तीको सर्वोच्च शिखर सगरमाथामा जब अक्कल बोहराले पाइला टेके । त्यो क्षण केवल व्यक्तिगत विजय थिएन-त्यो मुगुको थार्प गाउँदेखि संसारको सर्वोच्च चुचुरोसम्मको अविश्वसनीय यात्राको चरम विन्दु थियो ।

मुगुको छायानाथ रारा नगरपालिका-१३ स्थित थार्प गाउँमा जन्मेका अक्कलले भुईंबाट उठेर हिमाल चुम्ने सपना बोकेका थिए । त्यो सपना अब साकार भएको छ । उनले केवल हिमाल चुमेनन्, जीवनभर बोकिराखेको सपना, जन्मभूमिप्रतिको माया र कर्णालीको सन्देश पनि सगरमाथाको चुचुरोसम्म पुर्‍याए ।

४७ वर्षीय अक्कल बोहरा-पूर्व म्याराथन धावक, स्पेनमा बसोबास गर्ने समाजसेवी र अनगिन्ती नेपालीका प्रेरणास्रोत हुन् । बाल्यकालमा काठमाडौं ल्याइएपछि किताबभन्दा पहिले जुठा भाँडा माझ्नुपर्ने, कलम समाउनुअघि कुचो समाउनुपर्ने संघर्षपूर्ण जीवनबाट उठेर आज उनको जीवन एउटा प्रेरणादायी कथा बनेको छ ।

विद्यालयको आँगनभन्दा बढी भान्साको कुनामा बिताएको बाल्यकालपछि अक्कल भारततर्फ लागे । त्यहाँ उनले खेतबारीदेखि भारी बोक्ने काम गरे । पछि भारतीय सेनामा भर्ती भए । तर, राष्ट्रगान गाउने बेला ‘आफू गुमाएको’ तीव्र अनुभूति भएपछि स्वदेश फर्किए । त्यसपछि उनी सशस्त्र प्रहरी बलमा आबद्ध भए र त्यहीँबाट म्याराथन धावकका रूपमा उदाए ।

उनका लागि दौड केवल खेल थिएन,त्यो जीवनको बाटो थियो । राष्ट्रिय तथा अन्तर्राष्ट्रिय म्याराथनमा सफलतापूर्वक भाग लिंदै आत्मबल बढाउँदै लगे-त्यही आत्मबलले उनलाई सगरमाथा चढ्न सक्षम बनायो ।पछिल्ला १८ वर्षदेखि स्पेनको कोष्टा ब्लाङ्कास्थित आल्भिर शहरमा बस्दै आएका अक्कलले ‘रारा कफी बार रेस्टुरेन्ट’ सञ्चालन गर्दै आएका छन् । भित्ताभरि नेपालको झल्को दिने सजावट, आफैंले जितेका पदकहरू र सामाजिक योगदान झल्काउने तस्वीरहरूले त्यो क्याफेलाई नेपालीपनको प्रतीक बनाएका छन्।

उनी व्यवसायमै सीमित भएनन् । समाजसेवामा पनि उत्तिकै समर्पित अक्कलले ‘अक्कल कोपिला फाउन्डेसन’ मार्फत भूकम्प, मिर्गौला पीडा, बाढी, आगलागी र विपन्न अवस्थाका लागि झन्डै दुई करोड रुपैयाँभन्दा बढी सहयोग गरेका छन् । आफ्नो गाउँमा बाटो, विद्यालय र अन्य पूर्वाधारमा समेत उनले महत्वपूर्ण भूमिका खेलेका छन् ।

सगरमाथा आरोहणको अभ्यासस्वरूप उनले मेरापिक हिमाल सफलतापूर्वक चढेका थिए । अनुभवी शेर्पा मिग्मा डोक्पाको साथमा उनले आफ्नो आरोहण सफलतापूर्वक सम्पन्न गरे । ‘कर्णालीको पानी जस्तै सफा र सुन्दर मेरो देशको माया लिएर म सगरमाथामा पुगें’, अक्कलले क्याम्प दुईबाट अनलाइनखबरसँग कुराकारी गर्दै भने, ‘यो मेरो मात्र विजय होइन, सम्पूर्ण नेपालीहरूको, विशेषगरी कर्णालीको आवाज हो ।’

यो पनि पढ्नुहोस

अक्कलको सगरमाथा लक्ष्य