प्रतिस्पर्धाबाट नेतृत्व छान्न प्यानलसहित मैदानमा युवा संघ

११ जेठ, पोखरा । १ जेठ २०४७ मा युवा संघ गठन गरेर संयोजक बनेका केपी शर्मा ओली अहिले नेकपा एमालेको अध्यक्ष तथा देशकै प्रधानमन्त्री छन् ।

युवा संघको नेतृत्व गरेर पार्टी राजनीतिमा प्रवेश गरेकाहरू चर्चा र अवसरको केन्द्रमा मात्रै छैनन्, संघमा नेतृत्व कसलाई सुम्पिने भनेर कसरतसमेत गर्दै आएका छन् ।

केशव स्थापित, गोकर्ण विष्ट, महेश बस्नेत, राजीव पहारी, निरुदेवी पाललगायत युवा संघमा नेतृत्व गरेका नेताहरू सधैं चर्चामा रहे भने त्यसरी अवसरसमेत पाए ।

युवा संघको नेतृत्वमा को आउँछ भन्ने कुराले पूर्वअध्यक्षहरूको प्रभाव र पार्टीको राजनीतिलाईसमेत अर्थ राख्ने भएकाले पूर्वअध्यक्षसहित पदाधिकारीलेसमेत महाधिवेशनमा आफ्ना मान्छे बनाउन कसरत गर्ने गरेका छन् ।

संघको संस्थापक अध्यक्ष ओलीसहित नेताहरूको दबाब र प्रभावको सामना गर्दै प्यानलसहित प्रतिस्पर्धा गर्न नेता र प्रतिनिधि मैदानमा उत्रिएका छन् । ओलीले क्षितिज थेबेलाई सर्वसम्मत बनाउन दबाब दिएको नेताहरूले बैठकहरूमा प्रस्ट बताउने गरेका थिए ।

महासचिव सुमन पुरीले त्यसलाई अस्वीकार गर्दा देशभरका प्रतिनिधिहरूले आफ्नो नेतृत्व छान्ने अवसर पाएका हुन् । तर, जुनसुकै बेला पनि नेताहरूले एक जनाको नाममा निर्णय गर्न सक्ने, क्षितिजलाई सर्वसम्मत बनाउन रातभरमा ओली आफैंले निर्देशन दिनसक्ने भयसमेत प्रतिनिधिहरूमा देखिएको छ ।

नेतृत्वको निर्देशन र आदेशविपरीत प्रतिस्पर्धामा जाँदा पछि अवसरबाटै बञ्चित गर्ने, विभिन्न ठाउँमा निषेधै गर्नेसम्मका विगतका कारण पनि प्रतिनिधिहरू त्रसित देखिएका छन् । तर, ओलीले थेबेलाई नै दोहोर्‍याउन दबाब दिँदा एमालेभित्र आफ्नो प्रभाव बढाइरहेकी र अबको नेतृत्वको रूपमासमेत हेरिएकी पूर्वराष्ट्रपति विद्यादेवी भण्डारीको साथले सुमनको समूह उत्साहित बनेको बनेको छ ।

क्षितिजलाई सर्वसम्मत बनाउन महेश बस्नेत, भानुभक्त ढकाल, राजीव पहारीलगायतले कसरत गरेको भएपछि असफल भएका हुन् । वर्तमान अध्यक्ष क्षितिज र महासचिव सुमन पुरी अबको नेतृत्व हातमात्र प्यानलैसहित प्रतिस्पर्धाको मैदानमा प्रवेश गरेका छन् ।

शुक्रबारदेखि सर्वसम्मत गर्न दबाब बढाएका नेताहरूको प्रयासलाई असफल पार्दै दुवै जनाको प्यानलले आइतबार मनोनयन दर्ता गराएका छन् ।

यो पनि पढ्नुहोस

पूर्वराष्ट्रपति भण्डारीको साथ सुमन पुरीलाई

क्षितिजको समूहबाट उपाध्यक्षमा माहाराज गुरूङ र विनय शाह, महासचिव महेश चौलागाईं, उपमहासचिवमा उपेन्द्र शाही, सचिव महिला निशा लिम्बू, सचिव खुल्ला मोबिन आलम, मदन भण्डारी, देबु बस्नेतले मनोनयन दर्ता गराएका छन् ।

सुमन समूहबाट उपाध्यक्षमा प्रकाश गौतम, पर्वत भण्डारी, महासचिव कुबेर अधिकारी, उपमहासचिव खेम शर्माले मनोनयन दर्ता गराएका छन् ।

महिला सचिवमा रेशु तामाङ र सचिव (मधेशी) मा चित्ररञ्जन यादव, खुला सचिवमा धुर्व खड्का र अरूण कुँवरले सुमन समूहबाट मनोनयन दर्ता गराएका छन् ।

९ सदस्यीय पदाधिकारीसहित १ सय ५१ पदमा निर्वाचन हुने छ । योबाहेक पनि लेखा, अनुशासन, निर्वाचन र युवा विज्ञ आयोगमा अध्यक्ष, उपाध्यक्ष र सचिवकोसमेत मतदान हुनेछ । महाधिवेशनमा १ हजार ७६४ प्रतिनिधिले मतदान गर्ने छन् ।

मनोनयन दर्ता गराएर प्यानल नै चुनावी मैदानमा होमिएपछि नेताहरूको सक्रियतासमेत बढेको छ । कुन नेताको कसलाई समर्थन छ भन्ने चासोसमेत प्रतिनिधिहरूमा व्यक्त भइरहेको छ ।

सहमतिको प्रयास भन्दै नेता होटलमा बैठक बस्ने, प्रतिनिधि अनिर्णयको बन्दी बन्नुपर्ने स्थिति सिर्जना भएको भन्दै असन्तुष्टिसमेत जाहेर भएको थियो ।

शनिबार अध्यक्ष क्षितिजको समूहले उनलाई सर्वसम्मत अध्यक्ष घोषणा गर्न माग गरेर नारा लगाउँदै प्रदर्शन गरेपछि सुमनको समूहले पनि अध्यक्षको दाबीसहित प्रदर्शन गरेको थियो ।

दुवै पक्षका पदाधिकारीहरूले दाबी गर्दै नाराबाजी प्रदर्शन गर्दा प्रतिनिधिहरू भने चुनावी प्रक्रिया सुरु हुनेनहुने अन्योलकै बीच कार्यक्रम स्थगित भएको थियो ।

आइतरबा केही विभागका प्रविनिधिका विषयमा विवाद उत्पन्न भएको थियो । पछि विवाद टुंग्याउँदै प्रतिनिधिको नाम टुंग्याएपछि निर्वाचन कार्यक्रम घोषणा गरिएको हो ।

कार्यपालिकाअनुसार आइतबार रातिसम्म उम्मेदवारको मनोनयन फिर्ता, दाबीविरोधसक्ने र उम्मेदवारको नामावली प्रकाशन गर्ने प्रयास भइरहेको निर्वाचन अधिकृत चिरञ्जीवी पोखरेलले बताए ।

सार्वजनिक निर्वाचन कार्यक्रमअनुसार नै सम्पन्न गर्न नेताहरूसँग छलफल भइरहेको उनले जानकारी दिए । सोमबार बिहान साढे ७ बजेबाट मतदान थाल्ने बताइएको छ ।

रातभरमा नेतृत्वले सहमति गराउन वा कुनै निर्णय गर्न सक्ने भएकाले सोमबार बिहानमात्रै उम्मेदवारको अन्तिम नामावली प्रकाशन हुन सक्ने नेताहरूको भनाइ छ ।

अघिल्लो पटक पनि सुमनले अध्यक्षमा दाबी गरेका थिए तर अन्तितमा नेतृत्वकै आदेशअनुसार थेबे सर्वसम्मत अध्यक्ष बनेका थिए ।

आफू मतदानमार्फत नै दुई–दुई कार्यकाल अध्यक्ष निर्वाचित भएका महेश बस्ने आफैं भने टीका लगाएर आफ्ना मान्छे अध्यक्ष बनाउने प्रभाव जमाउने काम गर्दै आएका छन् ।

पहिलो कार्यकालमा नीरज आचार्य र पछिल्लोमा ईन्द्रलाल सापकोटालाई अध्यक्ष बनेका महेशले त्यसपछि भने चुनाव नगराई प्रभाव कायम राख्दै आएका हुन् ।

बस्नेतपछि निरुदेवी पाल अध्यक्ष बनिन् । त्यसपछि केही समय नेतृत्व विवाद भएपछि बस्नेतले नै राजीव पहारीलाई अध्यक्षको जिम्मेवारी सुम्पिएका थिए ।

त्यसयता रमेश पौडेल, बच्चनबहादुर सिंह, किरण पौडेल अध्यक्ष बने भने अघिल्लो कार्यकालमा बस्नेतकै सक्रियतामा थेबेलाई सर्वसम्मत बनाएका थिए ।

पछिल्लो समय भने बस्नेतको युवा संघमा प्रभाव कम भएको नेताहरूको भनाइ छ । बस्नेतले माहाराज गुरुङलाई अध्यक्ष बनाउन चाहेका थिए तर ओलीले नै थेबेलाई दोहोर्‍याउन चाहेपछि माहाराजलाई उपाध्यक्षको उम्मेवार बनाइएको छ ।

दुई पटक उपाध्यक्ष भएर यसअघि पनि थेबेलाई अध्यक्ष छाडेर महासचिव बनेका सुमन यसपटक भने पछाडि नहट्दा प्यानलैसहित मनोनयन दर्ता भएको हो । तर, रातभरमा नेतृत्वले निर्णय गरेर मतदान गर्न पाउने अवसरमा बञ्चित हुने संशय प्रतिनिधिमा कायमै छ ।

यो चुनावलाई नेताहरूले एमाले अध्यक्षसमेत रहेका प्रधानमन्त्री ओली र एमालेभित्र प्रभाव बढाइरहेकी पूर्वराष्ट्रपति विद्यादेवीको प्रतिष्ठालाई जाडेर हेरेका छन् ।