अधिक तरलता समस्या जटिल भएपछि वर्षकै पहिलो ४२ दिने निक्षेप संकलन

२५ जेठ, काठमाडौं । वित्तीय प्रणालीको अधिक तरलता समस्या झनै बढेपछि केन्द्रीय बैंकले दीर्घकालीन निक्षेप संकलन उपकरण प्रयोग गरेको छ ।

बैंकले आइतबार प्रणालीको २५ अर्ब तरलता खिच्न ४२ दिने निक्षेप संकलन जारी गरेको हो ।

केन्द्रीय बैंकले वित्तीय प्रणालीको अधिक तरलता र अल्पकालीन ब्याजदर व्यस्थापनका लागि निक्षेप संकलन उपकरण र स्थायी निक्षेप सुविधा मार्फत तरलता खिच्दै आएको छ ।

सोही क्रममा आइतबार अल्पकालीन नभई करिब डेढ महिनाका लागि तरलता खिच्ने उपकरण जारी गरेको हो । यसअघि केन्द्रीय बैंकले तरलता खिच्न २, ७, १३, १४, २१, २२ र २३ दिने अवधिको निक्षेप संकलन उपकरण जारी गर्दै आएको थियो ।

गत साता बुधबार मात्रै ३१ अर्ब ८५ करोड रुपैयाँ प्रणलीबाट खिचेको केन्द्रीय बैंकले आइतबार नै २५ अर्ब खिच्न लागेको हो ।

केन्द्रीय बैंकको खुला बजार कारोबार सम्बन्धी कार्यविधि २०७८ अनुसार वित्तीय बजारमा दीर्घकालीन प्रकृतिको अधिक तरलता स्थिति देखिए त्यसको व्यवस्थापन गरी बजार ब्याजदर व्यवस्थित गर्न कारोबार सञ्चालन समितिले आवश्यकता अनुसार कुनै पनि दिन संरचनात्मक खुला बजार कारोबार अन्तर्गत बढीमा ६ महिना अवधिको दीर्घकालीन निक्षेप संकलन उपकरण प्रयोग गर्न सक्ने व्यवस्था छ । यही व्यवस्था टेकेर केन्द्रीय बैंकले आइतबार ४२ दिने निक्षेप संकलन उकरण प्रयोग गरेको हो ।

कार्यविधि अनुसार दीर्घकालीन निक्षेप संकलन अवधि, कुल रकम, बोलकबोल मिति, निष्काशन मिति लगायत विषय तथा सर्त समितिले निर्धारण गरे बमोजिम हुनेछ ।

केन्द्रीय बैंकको मौद्रिक व्यवस्थापन विभागले सोही बमोजिम बोलकबोलका लागि आह्वान गरेको हो । दीर्घकालीन निक्षेप संकलन बोलकबोल बहुब्याजदर प्रणालीमा गरिने छ ।

दीर्घकालीन निक्षेप संकलन उपकरणको न्यूनतम बोल मूल्य १० करोड र ५ करोड रुपैयाँले भाग गर्दा निःशेष भाग जाने अंकमा अधिकतम आह्वान गरिएको रकमसम्म बोल गर्न सकिने छ ।

काउन्टर पार्टीले बोलपत्र फारममा आफूले निक्षेप बापत जम्मा गर्न चाहेको रकम र ब्याजदर उल्लेख गर्नुपर्ने छ । दीर्घकालीन निक्षेप संकलन रकम बाँडफाँट गर्दा काउन्टर पार्टीहरूले बोल गरेका ब्याजदर अनुसार सबैभन्दा कम दर बोल गर्ने रकम प्राथमिकता क्रममा राखी आह्वान गरेको रकमसम्म क्रमशः बाँडफाँट गरिने छ ।