मोरङदेखि प्रेमी बोलाएर पोखरामा हनी ट्रयाप, ५० लाख बार्गेनिङपछि ३ जना पक्राउ

News Summary

Generated by OK AI. Editorially reviewed.

मोरङदेखि प्रेमीलाई पोखरा बोलाएर सुनचाँदी व्यवसायीलाई हनी ट्र्यापमा पार्दै रकम माग गरेको आरोपमा तीन जना पक्राउ परेका छन्।
पक्राउ पर्नेहरूमा मरियम राई, देव लिम्बु र टेकबहादुर सुवेदी छन्, जसलाई जिल्ला प्रहरी कार्यालय कास्कीले पक्राउ गरेको हो।
प्रहरीले उनीहरूविरुद्ध आपराधिक लाभको कसुरमा अनुसन्धान अघि बढाएको र अडियो समेत फेला पारेको जनाएको छ।

२९ जेठ, काठमाडौं । मोरङदेखि प्रेमी बोलाएर पोखराका एक सुनचाँदी व्यवसायीलाई हनी ट्र्यापमा पार्दै रकम बार्गेनिङ गरेको आरोपमा तीन जना पक्राउ परेका छन् ।

पक्राउ पर्नेहरूमा पोखरा महानगरपालिका–१५ टुटुङ्‍गा बस्ने २७ वर्षीया मरियम राई, मोरङको विराटनगर चोक घर भएका ३८ वर्षीय देव लिम्बु र संखुवासभाको सभापोखरी गाउँपालिका–२ का ४० वर्षीय टेकबहादुर सुवेदी छन् ।

उनीहरूलाई जिल्ला प्रहरी कार्यालय कास्कीबाट खटिएको टोलीले पक्राउ गरेको हो ।

पक्राउ परेकाहरूविरुद्ध कास्की जिल्ला अदालतबाट आपराधिक लाभको कसुरमा ७ दिनको म्याद लिएर अनुसन्धान अघि बढाइएको कास्की प्रहरीका प्रवक्ता तथा डीएसपी हरि बस्नेतले बताए ।

पक्राउ परेकी युवती मरियम पोखराकै एक सुनचाँदी पसलमा काम गर्थिन् । आफैंले काम गर्ने पसलका सञ्चालकलाई हनी ट्र्याप शैलीमा फसाएर रकम लिने उदेश्यले थप दुई युवकलाई पोखरा बोलाएको पाइएको डीएसपी बस्नेतले बताए ।

पक्राउ परेका मध्य देव मेरियमको प्रेमी रहेको प्रहरीले बताएको छ । दुई युवक पोखरा पुगेपछि सुनचाँदी पसल सञ्चालककी श्रीमतीलाई उनीहरूले धम्क्याउँदै रकम माग गरेको पाइएको छ । श्रीमान्ले मेरियमलाई बलात्कार गरेको र जीन्दगीभरलाई पुग्ने सम्पत्ति नदिए मुद्दा मामिला गरेर सडाउने धम्की दिएको पाइएको एक अधिकृतले बताए ।

उक्त अडियो समेत प्रहरीले फेला पारेको छ । हनी ट्रयाप शैलीमा रकम असुल्न खोजेको भन्ने सूचना पाएपछि कास्की प्रहरीले उनीहरुलाई पक्राउ गरेको हो ।