पूर्वमन्त्री शास्त्रीको पार्थिव शरीर अन्तिम श्रद्धाञ्जलीका लागि मंगलबार सानेपामा राखिने

News Summary

Generated by OK AI. Editorially reviewed.

नेपाली कांग्रेसका दिवंगत केन्द्रीय सदस्य ढुण्डिराज शास्त्रीको पार्थिव शरीर अन्तिम श्रद्धाञ्जलीका लागि सानेपामा राखिने भएको छ।
उनको निधनप्रति कांग्रेस सभापति शेरबहादुर देउवाले गहिरो दुःख व्यक्त गरेका छन्।

२ असार, काठमाडौं । नेपाली कांग्रेसका दिवंगत केन्द्रीय सदस्य ढुण्डिराज शास्त्रीको पार्थिव शरीर अन्तिम श्रद्धाञ्जलीका लागि मंगलबार पार्टी केन्द्रीय कार्यालय सानेपामा राखिने भएको छ ।

पूर्वउद्योगमन्त्री समेत रहेका ९० वर्षीय शास्त्रीको उपचारका क्रममा काठमाडौं मेडिकल कलेज सिनामंगलमा सोमबार बिहान निधन भएको हो ।

प्रजातान्त्रिक आन्दोलनका योद्धा शास्त्रीको पार्थिव शरीर मंगलबार बिहान ९ बजेदेखि ११ बजेसम्म पार्टी केन्द्रीय कार्यालय सानेपामा राखिने कांग्रेस मुख्य सचिव कृष्ण प्रसाद पौडेलले जानकारी दिए ।

उनको निधनप्रति कांग्रेस सभापति शेरबहादुर देउवाले गहिरो दुःख व्यक्त गरेका छन् ।

‘नेपालको प्रजातान्त्रिक आन्दोलनका एक अथक योद्धा, सरल र निष्ठावान राजनीतिज्ञ, समाजवादी चिन्तक, पार्टीका पूर्व केन्द्रीय सदस्य एवं पूर्वमन्त्री ढुण्डिराज शास्त्रीको निधनको खबरले मलाई स्तब्ध र मर्माहत बनाएको छ’, देउवाको भनाइ उद्धृत गर्दै विज्ञप्तिमा भनिएको छ, ‘कांग्रेसको संगठन निर्माण र प्रजातान्त्रिक आन्दोलनहरुमा उहाँले पुर्‍याउनु भएको सक्रिय योगदान पार्टीको इतिहासमा सदा स्मरणीय रहनेछ ।’