कुलपतिसमक्ष उपकुलपति अर्यालले लिए शपथ

News Summary

Generated by OK AI. Editorially reviewed.

त्रिभुवन विश्वविद्यालयको नवनियुक्त उपकुलपति डा. दीपक अर्यालले शपथ लिएका छन्।
प्रधानमन्त्री केपी शर्मा ओलीले उनलाई नियुक्ति गरेका हुन्।

२५ असार, काठमाडौं । प्रधानमन्त्री एवं त्रिभुवन विश्वविद्यालयका कुलपति केपी शर्मा ओलीसमक्ष नवनियुक्त उपकुलपति प्रा.डा. दीपक अर्यालले पद तथा गोपनीयताको शपथ लिएका छन् ।

प्रधानमन्त्री निवास, बालुवाटारमा भएको कार्यक्रममा कुलपति ओलीसमक्ष उपकुलपति डा. अर्यालले शपथ लिएका हुन् ।

कार्यक्रममा सहकुलपति एवं शिक्षा, विज्ञान तथा प्रविधिमन्त्री रघुजी पन्तलगायत सहभागी थिए ।

शिक्षामन्त्री पन्तको अध्यक्षतामा गठित सिफारिस समितिले दीपक अर्याल, खड्ग केसी र प्रा.डा. विनिल अर्यालको नाम सिफारिस गरेको थियो ।

जसमध्येबाट कुलपति ओलीले डा. अर्याललाई उपकुलपतिमा नियुक्त गरेका थिए ।

अर्याल जल तथा मौसम विज्ञान केन्द्रीय विभागका पूर्वप्रमुख हुन् ।

१५ चैतमा प्रा.डा. केशरजंग बरालले राजीनामा दिएपछि त्रिविमा उपकुलपति पद रिक्त भएको थियो ।

२०५२ सालमा शिक्षण सहायकबाट त्रिविमा प्रवेश गरेका अर्याल उपकुलपति बने । उनी सेवा आयोगको प्रक्रिया पूरा गरेर त्रिवि छिरेका थिए ।

२०५४ सालमा स्थायी भएका उनी २०७६ सालमा प्राध्यापक भएका थिए । त्यसपछि उनी जल तथा मौसम विभागको प्रमुख समेत भए ।

नेपाल विज्ञान तथा प्रविधि प्रज्ञा प्रतिष्ठानका प्राज्ञ पनि हुन् ।