कैलाली कारागारका नाइके कुटिए, जेलरविरुद्ध नाराबाजी

२८ असार, धनगढी । कैलाली कारागारमा कैदीबन्दीहरूबीच विवाद भएको छ । शनिबार दिउँसो कारागारका नाइके खगेन्द्र बाेगटीमाथि कुटपिट भएपछि विवाद भएको हाे ।

प्रहरीकाअनुसार कुटपिटमा परेका बाेगटीकाे सेती प्रादेशिक अस्पतालमा उपचार भइरहेको छ । उनकाे नाक र मुखमा चाेट लागेको प्रहरीले जनाएको छ ।

बाेगटीमाथि भूपेन्द्र बडुवाल हत्या प्रकरणमा पुर्पक्षका लागि थुनामा रहेका कपिल श्रेष्ठकाे समूहले कुटपिट गरेकाे कारागार प्रशासनले जनाएको छ ।

घटना भएलगत्तै कैलालीका प्रमुख जिल्ला अधिकारी गाेगनबहादुर हमाल र प्रहरी उपरीक्षक(एसपी) बाल नरसिंह राणा कारागार पुगेका छन् ।

एसपी राणाले कैदीबन्दीहरूबीच समान्य विवाद भएको बताउँदै अहिले साम्य भइसकेको बताए । सुरक्षा स्रोतकाअनुसार बिहीबार प्रमुख जिल्ला अधिकारी हमालले गरेकाे निरीक्षणकाे क्रममा ब्लक ए मा रहेका कैदीहरूसँग माेबाइल फेला परेकाे थियो ।

त्यसपछि शुक्रबार ब्लक ए मा रहेका ७ जना कैदीबन्दीलाई ब्लक बी मा सारिएको थियो ।

तर, कारागारका नाइके बाेगटीले आफू जेलरकाे मान्छे हुँ भन्दै रवाफ देखाएको भन्दै श्रेष्ठकाे समूहले कुटपिट गरेको थियो तर प्रहरीले भने कैदीबन्दीबीच धकलधाकल हुँदाखेरि नाईकेलाई चाेट लागेको दाबी गरेकाे छ ।

प्रमुख अधिकारी हमालले पनि समान्य विवादले घटना भएको बताउँदै अहिले साम्य भइसकेको जानकारी दिएका छन् ।
कैदीबन्दीहरूले जेलर बसन्त खत्रीविरूद्व नाराबाजी समेत गरेका छन् ।

उनीहरूले सीडीओ र प्रहरी प्रमुखकै अगाडि जेलर खत्रीले मनाेमानी गरेकाे भन्दै उनीविरुद्ध नाराबाजी गरेका थिए ।