‘बहुविवाह’को प्रसंगमा केकी भन्छिन् : जो हुनुहुँदैन

काठमाडौं । सरकारले निश्चित परिस्थितीमा छुट दिने गरि बहुविवाहको कानुन ल्याउन लागेको भन्दै मिडियामा आउन खबर आउन थालेपछि यसलाई लिएर बहस चर्किएको छ ।

धेरैले सरकारको यो प्रयासले सामाजिक विकृत निम्त्याउने र लैंगिक असमानता बढाउन सक्ने भन्दै विरोध गरिरहेका छन् । कलाकारले पनि यसबारे आफ्नो धारणा राख्दै प्रस्तावित कानुनप्रति असहमति जनाइरहेका छन् ।

यस्तोमा, अभिनेत्री केकी अधिकारीसहितका कलाकारले यसबारे धारणा राखिरहेका छन् । केकीले बहुविवाहलाई बैध बनाउने प्रयासलाई समाजलाई पछाडि फर्काउने दुस्साहसको रुपमा टिप्पणी गरेकी छन् ।

यस्तो कानुनी प्रस्ताव आममहिलाको लागि अपमान रहेको उनको धारणा छ । कानुनी संरक्षणमा पुरुषलाई अपराध गर्न छुट दिने प्रावधान रहेको भन्दै उनले असहमति जनाएकी छन् ।

केकी लेख्छिन्, ‘यस्तो कानुनी प्रस्ताव आममहिलाका लागि अपमान हो । कानुनी संरक्षणमा पुरुषलाई सामाजिक अपराध गर्न छुट दिने प्रावधान हो । बहुविवाहलाई वैध बनाउने प्रयास समाजलाई पछाडि फर्काउने दुस्साहस हो । जो हुनुहुँदैन ।’

सरकारले मुलुकी अपराध संहिता लागू भएको दिन १ भदौ २०७५ देखि पूर्णतः निषेध रहेको बहुविवाहलाई निश्चित परिस्थितिमा छुट दिने गरी कानुन ल्याउन लागेको जनाइएको छ ।

विवाहित पुरुषले अर्की महिलासँग सम्बन्ध विस्तार गर्दा गर्भ रहे वा बच्चा जन्मिए दोस्रो विवाह कायम हुने गरी संहिताको धारा १७५ संशोधन गर्न लागिएको विवरणमा उल्लेख छ ।

कानुन मन्त्रालयले यसको मस्यौदा तयार गरिसकेको जनाइएको छ । यसलाई लिएर सामाजिक संजालमा चर्को विरोध निम्तिएको छ ।