ट्रम्प–पुटिन वार्ताअघि पनि रुस र युक्रेनले रोकेनन् आक्रमण

३० साउन,काठमाडौं । रुस–युक्रेन युद्धबिरामबारे अमेरिकी राष्ट्रपति डोनाल्ड ट्रम्प र रुसी राष्ट्रपति भ्ल्यादिमिर पुटिनबीच आज भेटवार्ता हुँदैछ ।

तर, ट्रम्प–पुटिन शिखरवार्ता सुरु हुनुभन्दा पनि पहिले पनि रुस र युक्रेनबीच युद्ध रोकिन सकेको छैन ।

युक्रेनी सेनाका अनुसार उसको विशेष सुरक्षा बलले रुसमाथि बिहीबार रातभर कयौं आक्रमण गरेका छन् ।

टेलिग्राममा जारी गरिएको एक बयानमा युक्रेनी सेनाले रुसको समारा क्षेत्रमा रहेको सिजरान तेल प्रशोधन केन्द्रलाई निसाना बनाएको उल्लेख छ ।

यो तेल प्रशोधन केन्द्र रुसको दक्षिणी–पश्चिमी भागमा अवस्थित छ । सिजरान शहरको नामबाट तेल प्रशोधन केन्द्रको नामाकरण गरिएको हो ।

यो प्रशोधन केन्द्रबाट रुसी सेनाका लागि कयौं किसिमका इन्धन सप्लाइ हुने गरेको युक्रेनी सेनाको दाबी छ ।

यस्तै रुसले पनि युक्रेनको उत्तर-पूर्वी शहर सुमीमा आक्रमण गरेको युक्रेनी आपतकाल सेवालाई उद्धृत गर्दै बीबीसीले उल्लेख गरेको छ । रुसी आक्रमणबाट त्यहाँको एक पेट्रोल पम्पमा आगलागी भएको थियो ।

अमेरिकी राष्ट्रपति डोनाल्ड ट्रम्पले बिहीबार फक्स न्यूज रेडियोसँग कुरा गर्दै पुटिनसँग वार्ता सकारात्मक भए युक्रेनी राष्ट्रपति भ्लोदिमिर जेलेन्स्कीलाई दोस्रो चरणको वार्ताका लागि बोलाउने बताएका थिए ।

युक्रेन र रुसी अधिकार क्षेत्रका विषयमा ट्रम्पले सीमाका भूभाग लेनदेन गरेर सम्झौता हुनुपर्ने औंल्याएका थिए ।

यो पनि पढ्नुहोस

ट्रम्प र पुटिनले वार्ताका लागि अलास्का नै किन रोजे ?