उत्तर कोरिया र दक्षिण कोरियाको सीमामा चल्यो गोली, उत्तर भन्छ- दक्षिणले उक्साउन खोज्यो

७ भदौ, काठमाडौं । उत्तर कोरियाली सैनिकले सीमा नाघ्न खोजेपछि गोली चलाएको दक्षिण कोरियाले पुष्टि गरेको छ ।

यसै साताको सुरुमा उत्तर कोरियाली सैनिकमाथि चेतावनी स्वरुप गोली चलाउनु परेको दक्षिण कोरियाको दाबी छ ।

उत्तर कोरियाली सैनिकले दुई देशबीचको प्रतिबन्धित सीमा रेखा नाघ्न खोजेपछि चेतावनीका लागि दक्षिण कोरियाली सैनिकले गोली चलाएको बीबीसीले उल्लेख गरेको छ ।

तर, उत्तर कोरियाली सरकारी सञ्चारमाध्यमले भने दक्षिण कोरियाली सैनिकले जानीबुझी गोली चलाएर उक्साउन खोजेको आरोप लगाएको छ । सीमा क्षेत्रमा गोली चलाएर दक्षिण कोरियाले तनाव बढाउन खोजेको उत्तर कोरियाली सञ्चारमाध्यमको जिकिर छ ।

दक्षिण कोरियाका नव निर्वाचित राष्ट्रपति ली जे म्यूङ शनिबार जापान र अमेरिका भ्रमणका लागि सिओलबाट प्रस्थान गरेका छन् । दक्षिण कोरियाली राष्ट्रपतिको विदेश भ्रमणको पूर्वसन्ध्यामा दुई देशको सीमामा गोली चल्नुले तनावको संकेत गर्ने समाचारमा उल्लेख छ ।

पछिल्ला सप्ताहमा उत्तर कोरियाले सीमा क्षेत्रमा आक्रामक प्रवृत्ति देखाउन विश्लेषण भइरहेको छ ।

उत्तर कोरियाका सर्वोच्च नेता किम जोङ उनकी बहिनी किम यो–जोंगले हालै दक्षिण कोरियाले गरेको सम्झौताको प्रस्तावलाई अस्वीकार गरेकी थिइन् ।

उत्तर कोरियाले दक्षिण कोरियासँगको सीमा स्थायी रुपमै बन्द गर्न प्रयास गर्दै आएको छ ।