रूसले युक्रेनमा गर्‍यो ६०० ड्रोन प्रहार, ४ बालबालिकासहित २१ जनाको मृत्यु

१३ भदौ, काठमाडौं । रूसले बिहीबार युक्रेनमाथि ५९८ वटा ड्रोन र ३१ वटा क्षेप्यास्त्रले आक्रमण गरेको छ।

बीबीसीका अनुसार, यस आक्रमणमा ४ बालबालिकासहित २१ जनाको मृत्यु भएको छ भने ४५ जना घाइते भएका छन्। आक्रमण अमेरिकी राष्ट्रपति ट्रम्प र रूसी राष्ट्रपति भ्लादिमिर पुटिनको अलास्कामा भएको भेटवार्ताको मात्र १३ दिनपछि भएको हो।

युक्रेनी राष्ट्रपति भोलोदिमिर जेलेन्स्कीले यसबारे प्रतिक्रिया दिंदै भनेका छन्, ‘रूसले शान्ति होइन, मिसाइल रोजेको छ।’

रूसी मिसाइलका छर्राबाट ब्रिटिश काउन्सिलको कार्यालय क्षतिग्रस्त भएको छ । रूसी आक्रमणमा ब्रिटिश सरकारको सम्पत्तिमा क्षति भएको यो पहिलोपटक हो ।

आक्रमणबाट युरोपेली संघ मिसनका भवनहरूमा समेत क्षति पुगेको छ। बेलायत र युरोपेली संघले रूसलाई कडा चेतावनी दिएका छन् भने ह्वाइट हाउसले भने वार्ता जारी रहने बताएको छ।

आक्रमणपछि कीभस्थित कार्यालयहरूमा क्षति पुगेको भन्दै बेलायत र युरोपेली संघले रूसी राजदूतहरूसँग स्पष्टीकरण सोधेका छन् ।

युक्रेनमा आक्रमण बढ्दा भारतलाई धम्की

यसैबीच अमेरिकी सांसद लिन्डसे ग्राहामले युक्रेनमा रूसी आक्रमणपछि भारतविरुद्ध आवाज उठाएका छन् । उनले रूसी आक्रमणको प्रसंग उठाउँदै प्रश्न गरे, ‘भारतलाई अब कस्तो लागेको होला?’

लिन्डसे ग्राहामले सामाजिक सञ्जाल प्लेटफर्म ‘एक्स’ मा लेखेका छन्, ‘भारत, चीन, ब्राजिल र अरू देशहरूले रसियाबाट सस्तो तेल किनेर पुटिनको युद्ध मेसिनलाई शक्ति दिइरहेका छन्: अब कस्तो अनुभव भइरहेको छ?’

उनले थपेका छन्, ‘तपाईंहरूको खरिदका कारण निर्दोष मानिसहरूको ज्यान गइरहेको छ। तीमध्ये बच्चाहरू पनि छन्।’

लिन्डसेले एउटा भिडियो पनि शेयर गरेका छन् जसमा युक्रेनमा रसियाको आक्रमणमा बालबालिकासहित कम्तीमा १५ जनाको मृत्यु भएको देखाइएको छ।

उनले भनेका छन्, ‘भारतले पुटिनलाई समर्थन गर्ने मूल्य तिरेको छ। बाँकी देशहरूको पालो पनि छिट्टै आउनेछ।’