गोपाल योञ्जनका कृतिको संग्रह अमेरिकाको कर्नेल युनिभर्सिटीलाई प्रदान

News Summary

Generated by OK AI. Editorially reviewed.

कालजयी गायक गोपाल योञ्जनका महत्वपूर्ण कलाकृति अमेरिकाको कर्नेल विश्वविद्यालयलाई निःशुल्क प्रदान गरिएको छ।
योञ्जनकी पत्नी रेन्चिनले ती कलाकृति दस्तावेजीकरण गरी विश्वविद्यालयलाई हस्तान्तरण गरेकी हुन्।
विश्वविद्यालयको दक्षिण एसिया संग्रहमा ती कृतिहरू संरक्षण र डिजिटलाइजेसन गरिनेछ।

काठमाडौं । कालजयी गायक, संगीतकार तथा नाटककार गोपाल योञ्जनका महत्वपूर्ण कलाकृतिको संग्रह अमेरिकाको न्यूयोर्कस्थित कर्नेल विश्वविद्यालयलाई प्रदान गरिएको छ ।

योञ्जनकी पत्नी रेन्चिनले दस्तावेजीकरण गरिएका ती कलाकृति निःशुल्करुपमा विश्वविद्यालयलाई प्रदान गरेकी हुन् ।

विश्वविद्यालयको दक्षिण एसिया संग्रहमा योञ्जनका ती कलाकृतिको संरक्षण र संवद्र्धन गरिने जनाइएको छ ।

‘युनिभर्सिटीको साउथ एसिया कलेक्सनमा गोपाल योन्जनका कृतिहरूको संरक्षणले नेपाली सङ्गीतलाई विश्वस्तरमा प्रस्तुत गर्दछ’ योञ्जनकी छोरी सिर्जनासिंहले सामाजिक सञ्जालमा लेखेकी छन् ।

कर्नेल युनिभर्सिटीलाई योञ्जनका महत्वपूर्ण र ऐतिहासिक दस्तावेज प्रदान गरेको जानकारी दिँदै सिर्जनाले यसले कृतिको संरक्षण र डिजिटलाइजेसन सुनिश्चित गर्ने जनाएकी छन् ।

संसारभरका अनुसन्धानकर्ता, विद्यार्थी र कलाकारको लागि संग्रहमा पहुँच हुने तथा यस संग्रहले भारतीय, बंगलादेशी र श्रीलंकाली कृतिसँगै नेपालको धनी संगीत परम्परालाई पनि उजागर गर्ने उद्देश्य लिइएको छ ।

कृतिको दीर्घायु र पहुँच सुनिश्चित हुने कुरामा उनले जोड दिएकी छन् ।

‘ गोपाल योन्जनका कृतिहरूको संरक्षणले राष्ट्रिय सम्पदालाई जोगाउँछ, अध्ययन र प्रेरणाको स्रोत प्रदान गर्दछ, र नेपाली सङ्गीतलाई विश्व सांस्कृतिक र शैक्षिक परिदृश्यमा स्थान दिन्छ’ सिर्जनाले भनेकी छन्, ‘कोर्नेल युनिभर्सिटीले यी कृतिमार्फत नेपाली सङ्गीतको विगत, वर्तमान, र भविष्यलाई भावी पुस्ताका लागि सुरक्षित राख्नेछ ।’