जनार्दन शर्माको कित्ता छाडेर अन्जना बिशंखे नेपाली कम्युनिस्ट पार्टीमा

News Summary

Generated by OK AI. Editorially reviewed.

नेकपा माओवादी केन्द्रकी स्थायी समिति सदस्य अन्जना विशंखे नेता जनार्दन शर्मा समूहबाट अलग भएकी छन्।
अन्जना विशंखेले नयाँ वाम मोर्चा बनाउने योजना अस्वीकार गरी नयाँ पार्टीमा फर्किएकी छन्।
उनले नयाँ पार्टी दर्ताका लागि आयोगमा पठाउने कागजातमा हस्ताक्षर गरेकी छन् र पार्टी दर्ताका लागि तयारी भइरहेको छ।

२३ कात्तिक, काठमाडौं । नेकपा माओवादी केन्द्रकी स्थायी समिति सदस्य अन्जना विशंखे नेता जनार्दन शर्मा समूहबाट अलग भएकी छन् ।

माओवादी केन्द्र र एकीकृत समाजवादीसहितका दलसँगको एकतालाई अस्वीकार गर्दै नयाँ वाम मोर्चा बनाउने कित्तामा उभिएकी बिशंखे अन्तत: एकतालाई अनुमोदन गर्दै नयाँ पार्टीमा फर्किएकी हुन् ।

माओवादी केन्द्र र एकीकृत समाजवादीसहित १० वामपन्थी समूहबीच १९ कात्तिकमा काठमाडौंमा एकता सभा गरेर नयाँ दल नेपाली कम्युनिष्ट पार्टी घोषणा गरिएको थियो ।

तर, माओवादी केन्द्रका उपहासचिव जनार्दन शर्मा, स्थायी कमिटी सदस्य राम कार्की र बिशंखेसहितका नेताले पत्रकार सम्मेलन गरेर छुट्टै प्रगतिशील मोर्चा बनाउने घोषणा गरेका थिए । बिशंखे पनि सो पत्रकार सम्मेलनमा उपस्थित थिइन् ।

तर, आइतबार बिशंखेले एकतापछि बनेको नेपाली कम्युनिस्ट पार्टी दर्ताका लागि आयोगमा पठाउने कागजातमा हस्ताक्षर गरेको संयोजक प्रचण्डको सचिवालयले जनाएको छ ।

‘उहाँले नयाँ पार्टी दर्ताको कागजातमा आज केन्द्रीय कार्यालय पेरिसडाँडा पुगेर हस्ताक्षर गर्नुभएको छ, उहाँ कतै जानुभएको छैन,’ प्रचण्डको सचिवालयका एक सदस्यले भने ।

नव गठित नेपाली कम्युनिस्ट पार्टी दल दर्ताका लागि निर्वाचन आयोग जाने तयारीमा छन् । प्रचण्ड संयोजक बनेका यस पार्टीमा माधव कुमार नेपाल सहसंयोजक छन् ।