‘वालनट बिस्ट्रो’ रेस्टुरेन्टमा पुस्तकालय, आफ्नो पुस्तक राखेर अर्को लिन मिल्ने

News Summary

Generated by OK AI. Editorially reviewed.

काठमाडौंको पानीपोखरीमा रहेको वालनट बिस्ट्रो रेस्टुरेन्टले ग्राहकलाई लक्षित गरी पुस्तकालय सञ्चालनमा ल्याएको छ।

२४ कार्तिक, काठमाडौं । काठमाडौंको पानीपोखरीमा रहेको वालनट बिस्ट्रो रेस्टुरेन्टले ग्राहकहरूलाई लक्षित गरी पुस्तकालय सञ्चालनमा ल्याएको छ । ग्राहकलाई स्वादिष्ट खानासँगै ज्ञानको पनि स्वाद चखाउने उद्येश्यसहित पुस्तकालय सञ्चालनमा ल्याइएको रेस्टुरेन्टका म्यानेजर राकेश डंगोलले बताए ।

रेस्टुरेन्टले हालै ‘लिटल फ्री लाइब्रेरी’ नौलो अभियानको सुरुवात गरेको छ। जसअन्तर्गत कोही ग्राहकले पुस्तक निःशुल्क लिन सक्ने र आफ्नै पुस्तक राखिदिन सक्ने व्यवस्था गरिएको छ।

रेस्टुरेन्टको प्रवेशद्वार नजिकै राखिएको पुस्तकालयमा साहित्य, कविता, यात्रा विवरण, जीवनीदेखि बालबालिका सम्बन्धी विविध पुस्तकहरू राखिएको छ । ‘पुस्तक छोड र पुस्तक लिएर जाऊ’ अर्थात् ‘एउटा लिनुस्, एउटा राखिदिनुस्’ भन्ने अवधारणामा अनुसार पुस्तक आदान-प्रदान गरी पढ्ने संस्कृतिलाई प्रोत्साहन गर्ने उद्देश्यले पुस्तकालय सञ्चालनमा ल्याइएको म्यानेजर डंगोलको भनाइ छ ।

डंगोलले पुस्तकालयले प्रत्यक्ष रुपमा समाज र मानिसलाई जोड्ने विश्वास व्यक्त गरे। यसले नेपाली भाषा, साहित्य र सिर्जनशीलतालाई प्रोत्साहन दिँदै सांस्कृतिक पहिचान जोगाउन योगदान गर्ने दावी उनको छ ।