आश्माको कभर डान्स भिडियोलाई पाँच दिनमै साढे ७ करोड भ्यूज

News Summary

Generated by OK AI. Editorially reviewed.

नेपाली डान्सर आश्मा विश्वकर्माले दक्षिण भारतीय फिल्म 'पेड्डी' को गीत 'चिक्री चिक्री' मा आधारित डान्सिङ भिडियो बनाएकी छिन्।
उनको भिडियो रिलिजको पाँचौ दिनसम्म फेसबुक, इन्स्टाग्राम, टिकटक र युट्युबमा कुल ७ करोड ५५ लाख भ्यूज प्राप्त भएको छ।
बलिउड अभिनेत्री जान्ह्वी कपुरले पनि आश्माको भिडियो सेयर गरेकी छिन् र नेपाली तथा बलिउड सेलिब्रेटीले प्रशंसा गरिरहेका छन्।

काठमाडौं । एक दक्षिण भारतीय फिल्मको गीतमा ‘कभर डान्स भिडियो’ बनाएकी नेपाली डान्सर आश्मा विश्वकर्माले यतिबेला चौतर्फी चर्चा बटुलेकी छिन् । सामाजिक सञ्जालमा उनको भिडियोलाई उत्साहजनक भ्यूज मिलेको छ ।

रिलिजको पाँचौ दिन सोमबारसम्म फेसबुक, इन्स्टाग्राम, टिकटक र युट्युबमा गरेर कूल ७ करोड ५५ लाख भ्यूज प्राप्त भएको छ । आश्माको करिअरमा पनि यो सर्वाधिक भ्यूज पाउने भिडियो हो ।

‘कार्टुन्ज क्रू’ नामक एक नृत्य समूहसँग आबद्ध आश्माले रामचरण स्टारर फिल्म ‘पेड्डी’ को गीत ‘चिक्री चिक्री’मा आधारित रहेर एक डान्सिङ भिडियो बनाएकी थिइन् ।

फेसबुकमा सोमबार दिउँसोसम्म २ करोड, इन्स्टाग्राममा २ करोड २४ लाख, टिकटकमा २ करोड २८ लाख र युट्युब सर्ट्समा १ करोड ३ लाख भ्यूज पुगेको छ । भ्यूजको यो गति उकालो लाग्ने क्रममा देखिन्छ ।

उनको भिडियोलाई ‘पेड्डी’ फेम्ड अभिनेत्री जान्ह्वी कपुरले पनि सेयर गरेकी थिइन् । बलिउड र नेपाली सेलिब्रेटीले पनि उनको भिडियोलाई प्रशंसा गरिरहेको देखिन्छ ।