निर्माण व्यवसाय विकास परिषद्‌ले पुनर्निर्माण कोषलाई दियो एक करोड

News Summary

Generated by OK AI. Editorially reviewed.

निर्माण व्यवसाय विकास परिषद्‌ले जेन—जी आन्दोलनबाट क्षति भएका संरचनाको पुनर्निर्माणका लागि एक करोड रुपैयाँ कोषमा जम्मा गरेको छ।
परिषद्का अध्यक्ष कुलमान घिसिङले शहरी विकास मन्त्रालयका सचिव गोपाल प्रसाद सिग्देललाई चेक हस्तान्तरण गर्नुभएको छ।
भौतिक पुनर्निर्माण समितिले कोषबाट क्षतिग्रस्त संरचनाको मर्मतसम्भार र आर्थिक पुनरुत्थानमा खर्च गर्ने निर्णय गरेको छ।

३ मंसिर, काठमाडौं । निर्माण व्यवसाय विकास परिषद्‌ले जेन—जी आन्दोलनबाट क्षति भएका भौतिक संरचनाको पुनर्निर्माण, आर्थिक पुनरुत्थान, राहत र पुनर्स्थापनाका लागि स्थापना गरिएको कोषमा एक करोड रुपैयाँ जम्मा गरेको छ ।

परिषद् मातहत रहेको निर्माण व्यवसायी कोषबाट बुधबार भौतिक पुनर्निर्माण कोषमा रकम जम्मा गरिएको हो । परिषद्का अध्यक्षसमेत रहेका भौतिक पूर्वाधार तथा यातायातमन्त्री कुलमान घिसिङले शहरी विकास मन्त्रालयका सचिव गोपाल प्रसाद सिग्देललाई चेक हस्तान्तरण गरे । कोषमा हालसम्म ७ करोड ५४ लाख रुपैयाँ जम्मा भएको छ ।

आन्दोलनबाट क्षति भएका सार्वजनिक तथा सरकारी भौतिक संरचनाको पुनर्निर्माण कार्यलाई व्यवस्थित र प्रभावकारी बनाउन अर्थमन्त्री अध्यक्ष रहने गरी भौतिक पुनर्निर्माण समिति गठन गरिएको छ ।

समितिको केही दिनअघिको बैठकले कोषमा जम्मा भएको रकम क्षतिग्रस्त सार्वजनिक संरचनाको विस्तृत इन्जिनियरिङ डिजाइन तयार गरी पुनर्निर्माणको प्रतिवेदन तयार गर्न, सार्वजनिक संरचनाको तत्काल मर्मतसम्भार गरी सेवा चालू गराउन र आर्थिक पुनरुत्थान, राहत र पुनर्स्थापनाका कार्यक्रममा खर्च गर्ने निर्णय गरेको थियो ।