ऊर्जामन्त्री श्रेष्ठले विद्युत् नीतिको मस्याैदामाथि थाले आन्तरिक छलफल

News Summary

Generated by OK AI. Editorially reviewed.

ऊर्जा, जलस्रोत तथा सिँचाइ मन्त्री विराजभक्त श्रेष्ठले विद्युत् नीतिमाथि आन्तरिक छलफल सुरू गरेको जानकारी दिनुभयो।
मन्त्री श्रेष्ठले नीतिको मस्यौदामाथि सरोकार पक्षसँग वृहत् छलफल गरी दीर्घकालीन सोचका साथ अगाडि बढाउन निर्देशन दिनुभयो।
विद्युत् नीतिले जलविद्युत् तथा स्वच्छ ऊर्जाको विकासमा पुँजी परिचालन अवधारणासमेत समेट्नुपर्ने उहाँको भनाइ छ।

२० चैत, काठमाडौं । ऊर्जा, जलस्रोत तथा सिँचाइ मन्त्री विराजभक्त श्रेष्ठले विद्युत् नीतिको मस्याैदामाथि आन्तरिक छलफल सुरू गरेका छन् । समग्र ऊर्जा क्षेत्रको विकास, संरचनागत एवम् संस्थागत सुधार, ऊर्जा उपयोग, वातावरण संरक्षणलगायतका विषयलाई मस्याैदामा समेट्नुपर्ने उनको भनाइ छ ।

शुक्रबार भएको उक्त छलफलमा मन्त्री श्रेष्ठले विद्युत् नीति ल्याउँदा ऊर्जा क्षेत्रको समग्र तथ्य र तथ्यांकसमेत स्पष्ट हुने गरी अगाडि बढाउन मातहतका निकायलाई निर्देशन दिए । नीतिको मस्यौदामाथि सरोकार पक्षहरूसँग वृहत् छलफल गरी दीर्घकालीन सोचका साथ अगाडि बढाउनुपर्ने उनले बताए ।

गुणस्तरीय ऊर्जा आपूर्ति, आन्तरिक खपतमा वृद्धि, ऊर्जा सम्मिश्रण, जलवायु परिवर्तनको प्रभाव, लस एन्ड ड्यामेज, कार्वन ट्रेडजस्ता गम्भीर विषयलाई विद्युत् नीतिले सम्बोधन गर्नुपर्नेमा मन्त्री श्रेष्ठले जोड दिए । उनले भविष्यमा आइपर्ने ऊर्जा क्षेत्रका चुनौतीलाई अहिलेदेखि नै सोच्नुपर्ने बताए ।

आगामी दिनमा ऐन, कानुन निर्माण गर्दा विद्युत् नीतिले नै दिशानिर्देश गर्ने हुँदा नीति ल्याउँदा भविष्यका सम्भावित चुनौतिको सामना गर्न तयार हुने गरी ल्याउनुपर्ने बताए । विद्युत् नीतिले जलविद्युत् तथा स्वच्छ ऊर्जाको विकासमा दूरगामी प्रभाव पार्ने पुँजी परिचालनको अवधारणासमेत समेट्ने गरी तयार गर्नुपर्नेमा मन्त्री श्रेष्ठको जोड थियो ।

ऊर्जा क्षेत्रमा निजी क्षेत्रको भूमिकासमेत महत्त्वपूर्ण रहेकाले निजी क्षेत्रको सहभागिता बढाउने र प्रतिफलको सुनिश्चितता गर्नेतर्फ पनि विद्युत् नीतिले ध्यान दिनुपर्ने उनको भनाइ छ ।