हुम्लाको नेप्का गाउँमा बाढीले स्कुल र गोठहरु बगायो, भेडाबाख्रा र खेतीयोग्य जग्गामा पनि क्षति

६ जेठ, हुम्ला । हुम्लाको चंखेली गाउँपालिका–५ नेप्का गाउँमा आएको बाढीपहिरोले ठूलो क्षति पुगेको स्थानीयले बताएका छन् ।

गएराति एक्कासी असिना–पानी सहितको बाढीले डाँफे आधारभूत विद्यालय नै बगाएको छ । साथै खेतीयोग्य जग्गा र गोठहरु पनि बगाएको प्रारम्भिक जानकारी आएको चंखेली गाउँपालिका वडानम्बर ५ का बासिन्दा छक्कबहादुर तामाङले जानकारी दिए ।

वडाध्यक्ष हर्कधन तामाङ र धनसिंह तामाङका गोठ पनि पहिरोले पुरेको छ । त्यसबाट भेँडाबाख्रामा क्षति पुगेको छ ।

वडाध्यक्ष हर्कधन तामाङले पहिरोले गोठ पुरिए पनि कति क्षति भयो भन्ने यकिन जानकारी हुन नसकेको बताए । उनले मानवीय क्षति भएको बारे भने अहिलेसम्म जानकारी नभएको बताए ।

अनलाइनखबरसँग टेलिफोन कुराकानीमा उनले भने, ‘म गाउँपालिकाको केन्द्रमा छु, राति गाउँमा बाढी–पहिरो आएर मेरो र धनसिंह तामाङको गोठ पुरिँदा भेँडाबाख्रा पुरिए रे थप कुरा बुझ्दैछु ।’

गाउँमा कोदो खेती हुने धेरै जग्गा बाढीले क्षतविक्षत बनाएको उनले जानकारी दिए । ‘जग्गा त तहसनहस पारेर केही बाँकी छैन रे,’ उनले भने, ‘रातिको घटना भएकाले क्षतिको एकिन हुनसकेको छैन,’ उनले भने ।

घटनास्थलमा मेल्छाम प्रहरीचौकीको टोली आज बिहान प्रस्थान गरेको छ ।

प्रमुख जिल्ला अधिकारी टेक कुमार रेग्मीले नेप्का गाउँ दुर्गममा भएकाले क्षतिको पूर्ण विवरण आउन नसकेको बताए । ‘बाढी–पहिरोले क्षति पुगेको भन्ने सूचना पाएको छु । स्थानीय र प्रहरीमार्फत् बुझ्ने काम भइरहेको छ,’ उनले भने ।

हुम्ला सदरमुकाम सिमकोटदेखि उत्तरपूर्वमा पर्छ चंखेली गाउँपालिका तल्लो पाली, माथिल्लो पाली, पिप्लाङ र नेप्का गरी चार गाउँ छन् । नेप्का गाउँ ५ नम्बर वडामा पर्छ । यहाँ मोटर गुड्ने सडक छैन । गाउँपालिकाको केन्द्रसम्म पुग्न अप्ठ्यारो बाटोमा ज्यानकै जोखिम मोलेर पाँच घण्टा पैदल हिँड्नुपर्ने बाध्यता छ ।