गायक पशुपति शर्मा अब फिल्मका हिरो, साइन गरे ‘तीन तिघ्रे, क्या बिग्रे’

News Summary

Generated by OK AI. Editorially reviewed.

लोक दोहोरी गायक पशुपति शर्माले ‘तीन तिघ्रे, क्या बिग्रे’ नामक चलचित्रबाट नेपाली अभिनय क्षेत्रमा डेब्यु गर्ने भएका छन् ।
रघुनाथ सापकोटा निर्माता र अमरदीप सापकोटा निर्देशक रहेको सो चलचित्रको छायाङ्कन असार दोस्रो सातादेखि शुरू हुने जनाइएको छ ।
यसअघि चलचित्र ‘प्रेमगीत’मा पार्श्व गायन गरेका शर्माको अभिनय यात्राले चलचित्र क्षेत्रमा नयाँ उत्साह थप्ने निर्माण पक्षको विश्वास छ ।

काठमाडौं । लोक तथा दोहोरी संगीतका प्रसिद्ध गायक पशुपति शर्माले फिल्म अभिनयमा डेब्यू गर्ने भएका छन् । रघुजी फिल्म्सको आगामी कथानक ‘तीन तिघ्रे, क्या बिग्रे’ फिल्ममा उनी अनुबन्धित भएका छन् ।

केही महिनाअघि नै उनी यो फिल्ममा आबद्ध भैसकेपनि निर्माताले विहिबार मात्र उनको कास्टिङबारे औपचारिक घोषणा गरेको हो । अमरदीप सापकोटाको पटकथा तथा निर्देशन हुने यो फिल्मको छायांकन असार दोस्रो सातादेखि हुने जनाइएको छ ।

‘पछिल्लो समय नेपाली चलचित्र बजारमा एकै प्रकारका कथावस्तु र सीमित कलाकारको वर्चस्व देखिएको अवस्थामा शर्माको प्रवेशले नयाँ उत्साह थप्ने विश्वास गरिएको छ’ निर्माता रघुनाथ सापकोटाले विज्ञप्तिमा भनेका छन् ।

फिल्मको टाइटल सुन्दा हाँस्य कथावस्तुमा बन्न लागेको हो कि भन्ने अनुमान गर्न सकिन्छ । प्रेषित विवरणमा गायक शर्मालाई निर्माता र निर्देशकसँग देख्न सकिन्छ ।

फिल्म गायनमा भने पशुपतिको यो पहिलो होइन । उनले प्लेब्याक गायनमा फिल्म ‘प्रेमगीत’मार्फत डेब्यू गरिसकेका छन् । ‘यता तिर्खा लागेको’ उक्त गीत त्यतिबेला निकै रुचाइएको थियो ।

पशुपतिका गीतले प्रेम, परिवार, वैदेशिक रोजगारी, सामाजिक विकृति, राजनीतिक अवस्था, राष्ट्रियता र ग्रामीण जीवनका विविध पक्षलाई समेट्ने गरेका छन् । उनले लोकसंगीतलाई मनोरञ्जनको माध्यम मात्र नभई समाजका आवाज र जनभावना व्यक्त गर्ने प्लेटफर्मका रूपमा प्रयोग गरेका छन् ।

उनका ‘लुट्न सके लुट’, ‘छाता हरायो’, ‘मलाई अमेरिका यही’, ‘बोल माया’ लगायतका गीतले ठूलो लोकप्रियता हासिल गरेका छन् । विशेषगरी ‘लुट्न सके लुट’ गीतले नेपाली समाजमा भ्रष्टाचार र बेथितिविरुद्ध व्यंग्यात्मक सन्देश दिएर व्यापक चर्चा पाएको थियो ।