लिङ्देनलाई दिलविकासले भने- पार्टी कार्यालय रहेको मेरो घर खाली गरिहाल्नुस्

News Summary

Generated by OK AI. Editorially reviewed.

घरधनी दिलविकास राजभण्डारीले राष्ट्रिय प्रजातन्त्र पार्टी (राप्रपा) लाई विशालनगरस्थित आफ्नो घर तुरुन्त खाली गर्न खुला पत्रमार्फत आग्रह गरेका छन् ।
राजभण्डारीले राप्रपा अध्यक्ष राजेन्द्र लिङ्देनको आर्थिक हैसियतमाथि प्रश्न उठाउँदै काठमाडौंको भवन र इलामको रिसोर्टको स्रोत खुलाउन माग गरेका छन् ।
उनले २०७९ सालको निर्वाचनमा पार्टीका कोषाध्यक्ष नीलकण्ठ काफ्लेलाई दिएको रकममध्ये बाँकी ३५ लाख रुपैयाँ फिर्ता गर्न माग गरेका छन् ।

४ असार, काठमाडौं । राष्ट्रिय प्रजातन्त्र पार्टी (राप्रपा) को विशालनगरस्थित घर खाली गर्न घरधनी दिलविकास राजभण्डारीले भनेका छन् ।

राप्रपा अध्यक्ष राजेन्द्र लिङ्देन र केन्द्रीय समितिलाई खुला पत्र राजभण्डारीले घर खालि गर्न भनेका छन् ।

राप्रपा परित्याग गरेका डा. धवलशमशेर राणाको पक्षमा देखिएका राजभण्डारीले राप्रपा अध्यक्ष लिङ्देनको आर्थिक हैसियतमा समेत प्रश्न उठाएका छन् ।

‘यति छिट्टै राजधानीमा आलिशान भवन कसरी खडा भयो ? इलाममा रिसोर्ट बनाउने आर्थिक स्रोत कहाँबाट जुटाउनु भयो ?,’ उनले प्रश्न गरेका छन् ।

२०७९ सालको निर्वाचनमा कोषाध्यक्ष नीलकण्ठ काफ्लेलाई ४५ लाख रुपैयाँ दिएकोमा १० लाख रुपैयाँ मात्रै फिर्ता पाएको राजभण्डारीले खुलापत्रमा लेखेका छन् ।

‘बाँकी रहेको ३५ लाख रुपैयाँ आलटाल नगरी तुरुन्त फिर्ता दिनुहोस् । तपाईले राप्रपा डुबाउनुभयो । मेरो अन्तरआत्माको पुकार अनुसार तुरुन्त मेरो घर खालि गरिहाल्नुहोस् ।’