दक्षिण कोरियामा हिटवेभ: सोलको तापक्रम ३९ डिग्री पुग्ने, २० भन्दा बढीको मृत्यु

२१ साउन, काठमाडौं । दक्षिण कोरियामा अत्यधिक गर्मीका कारण भीषण हिटवेभ चलेको छ। राजधानी सोलमा बिहीबार तापक्रम ३९ डिग्री सेल्सियस पुग्ने अनुमान गरिएको छ। यो अत्यधिक गर्मीका कारण अहिलेसम्म २० भन्दा बढी मानिसको मृत्यु भइसकेको छ।

दक्षिण कोरियाका राष्ट्रपति ली जे म्युङले बिहीबार हिटवेभ प्रतिक्रिया सम्बन्धी बैठकमा सम्बोधन गरे। उनले भने, “हामीले कहिल्यै अनुभव नगरेको स्तरको अत्यधिक गर्मी दिनप्रतिदिन जारी छ। पहिले विदेशी समाचारहरूमा मात्र देखिने हिटवेभको स्थिति अहिले हाम्रो यथार्थ बनेको छ।”

राष्ट्रपति लीले स्थिति सहज नभएसम्म उपलब्ध सबै जनशक्ति र स्रोतसाधन परिचालन गर्न मन्त्रालय तथा स्थानीय सरकारहरूलाई निर्देशन दिए। उनले नागरिकको जीवन रक्षा, जोखिममा रहेका बासिन्दाको सुरक्षा र बाहिर काम गर्ने कामदारलाई विश्रामको नियम कडा रूपमा पालना गराउन जोड दिए।

यो अनुमानित तापक्रम सन् २०१८ को अगस्टमा कायम भएको ३९.६ डिग्री सेल्सियसको ऐतिहासिक रेकर्ड नजिक पुग्नेछ। मौसमविद्हरूका अनुसार सोलले आफ्नो आधुनिक इतिहासकै सबैभन्दा तातो दिनहरू सामना गरिरहेको छ।

कोरिया मेटियोरोलोजिकल एडमिनिस्ट्रेशनका अनुसार केही क्षेत्रमा रातिको तापक्रम ३० डिग्री सेल्सियसभन्दा तल ओर्लिएको छैन । गर्मीबाट बच्न सर्वसाधारणहरू खोला, डिपार्टमेन्ट स्टोर र एयर कन्डिसन्ड स्थानहरूमा पुगेका छन्।

गर्मीका कारण दर्शकहरू अचेत हुन थालेपछि कोरिया बेसबल अर्गनाइजेसनले बुधबार र बिहीबारका सबै १० वटा खेल रद्द गर्‍यो। इन्चोनमा भएको खेलको क्रममा एक प्रशंसक अचेत भएर ढलेका थिए।

मौसमविद्हरूका अनुसार टाइफुन डल्फिनले दक्षिण कोरियामा प्रत्यक्ष खतरा नपुऱ्याए पनि यो गर्मी बढाउन जिम्मेवार रहेको छ। पूर्वी हावालाई बलियो बनाएर पश्चिमी क्षेत्रमा तातो र शुष्क हावा बगाउन टाइफुन डल्फिनले मद्दत गरेको छ। यसले सोल र अन्य क्षेत्रमा गर्मी अझ तीव्र बनाएको छ।