नवलपरासीका उत्कृष्ट चार किसानलाई मेसिन अनुदान

१३ मंसिर । नवलपरासीका उत्कृष्ट चारजना दुग्धको कारोबार गर्ने किसानलाई दूध दुहुन प्रयोग हुने मेसिन प्रदान गरिएको छ ।

पशुसेवा विभागबाट प्राप्त भएका चारवटा दूध दुहुन प्रयोग हुने मेसिन किसानलाई वितरण गरिएको पशुसेवा कार्यालयका प्रमुख डा. शंकर शाहले बताए ।

सो मेसिन प्राप्त गर्ने किसानहरुमा गोपाल श्रेष्ठ, दधीराम सुवेदी, पदम ढकाल, होमनाथ कँडेल रहेका छन् ।

विशेष गरी नवलपरासीको मुकुन्दपुर क्षेत्र दुग्ध उत्पादनका लागि नेपालमै नमुना मानिन्छ ।

जिल्लामा दूधको सङ्कलन र बिक्री गर्ने कारोबार गर्ने ७२ वटा ठूला संस्था रहेका छन् । नवलपरासीमा वार्षिक ६३ हजार मेट्रिक टन दूध उत्पादन हुँदै आएको छन् । रासस