नेपाली फिल्मको माहोल बनाउन हिन्दी फिल्म कुर्नु लाजमर्दो बिषयः निश्चल बस्नेत

निर्देशक, निर्माता तथा कलाकार निश्चल बस्नेतले चलचित्र क्षेत्रलाई चलायमान बनाउन सरकारले के गर्ला भनेर बस्नु भन्दा पनि चलचित्रकर्मीहरु आफै अगाडि सर्नुपर्ने बताएका छन् । काठमाण्डौमा आयोजना गरिएको चलचित्र ‘लप्पन छप्पन २’को पत्रकार सम्मेलनमा बोल्दै निश्चलले भने–‘यहाँ कसैले त जोखिम मोल्नै पर्छ । अहिले धेरै मेकरले एउटा हिन्दी चलचित्र आओस् अनी वातावरण बनाइदियोस् भनेर सोच्नुभएको छ । हाम्रो क्षेत्र चलायमान बनाउन हिन्दी चलचित्रको मुख ताक्नु लाजमर्दो कुरा हो ।’

निश्चलले निर्माताहरुलाई चलचित्र रिलिजका लागि प्रोत्साहन गर्न आवश्यक रहेको बताए । उनले भने–‘यो बिषयमा सबैभन्दा बढी चलचित्र विकास बोर्डले सोच्नुपर्छ । स्टूडियो बनाउने बिषयमा केही समय पर्खिदा पनि हुन्छ । यो क्षेत्र अगाडि बढ्यो भने स्टूडियोमा गएर खिचौंला । तर, यो क्षेत्र नै चलायमान भएन भने कसरी चलचित्र क्षेत्र अगाडि बढ्छ । यसका लागि चलचित्र विकास बोर्डले संचार मन्त्रालयसँग् समन्वय गरेर चलचित्र रिलिजको वातावरण बनाउनुपर्छ ।’

निश्चलले प्रदर्शक तथा वितरकले पनि निर्मातालाई सुरक्षित बनाउनेतर्फ सोच्नुपर्ने बताए । उनले चलचित्र रिलिज गर्न नसक्ने हो भने दर्शकले पनि विश्वास गर्ने तर्क गरे ।

उनले, यो समय चलचित्र क्षेत्रमा रहेका तिक्तता विर्सिएर सबैले एक अर्कालाई साथ दिनुपर्ने बताएका छन् । निश्चलले पत्रकार सम्मेलनमा भने–‘यो समयमा पनि हामी एक हुन सकेनौं भने अरु बेलामा सक्दैनौ । खडेरी लागेको बेलामा पनि नभएको यूनिटी अरु बेलामा हुन्छ भन्ने मलाई लाग्दैनँ । एक बर्षसम्म जती पनि चलचित्र रिलिज हुन्छन्, ती चलचित्रको बिषयमा सबै चलचित्रकर्मीले सोच्नुपर्छ ।’