‘हिमालयन रि’लाई पुनर्बीमा लाइसेन्स दिने बीमा समितिको निर्णय

१७ जेठ, काठमाडौं । बीमा क्षेत्रको नियामक निकाय बीमा समितिले प्रस्तावित हिमालयन रि–इन्स्याेरेन्सलाई पुनर्बीमा व्यवसाय सञ्चालनका लागि सञ्चालन अनुमति (लाइसेन्स) दिने निर्णय गरेको छ ।

पुनर्बीमा कम्पनीको लाइसेन्स लिने दौडमा हिमालयनसहित पाँच कम्पनीहरु थिए । अन्य चारलाई पछि पार्दै हिमालयनले लाइसेन्स हात पार्ने भएको हो ।

‘हामीले हिमालयन रिलाई लाइसेन्स दिने निर्णय गरेका छौँ, माइन्यूट हुन मात्रै बाँकी छ’ बीमा समितिका एक अधिकारीले भने, ‘अब अन्य कम्पनीहरु आउट भएका छन्, हिमालयनको प्रक्रिया शुरु हुन्छ ।’

हाल मुलुकमा एक मात्रै पुनर्बीमा कम्पनी सञ्चालनमा छ । दुईवटा आवश्यक पर्ने भन्दै नियामक निकाय बीमा समितिले थप एउटालाई लाइसेन्स दिन आवेदन माग गरेको थियो ।

यो पनि पढ्नुहोस

पुनर्बीमा लाइसेन्सको दौडमा पाँच कम्पनी, कुन कम्पनीमा को छन् लगानीकर्ता ?

हिमालयनसँगै काठमाडौं रि–इन्स्योरेन्स, अन्नपूर्ण रि–इन्स्योरेन्स र प्रुडेन्सियल रि–इन्स्याेरेन्सले पनि लाइसेन्सका लागि निवेदन दर्ता गराएका छन् । व्यवसायी सुलभ अग्रवालले हिमालयन रि दर्ताका लागि निवेदन दिएका थिए ।

यस कम्पनीको संस्थापकहरुमा नेपालका चर्चित व्यावसायिक घरानाहरु प्रस्ताव गरिएको छ । प्रतिस्पर्धामा रहेका अन्य कम्पनीहरुमा व्यवसायीहरु तथा बीमाका विज्ञहरु समेत थिए ।

अरुलाई भन्दा हिमालयनलाई नै लाइसेन्स दिनु उपर्युक्त देखिएको समितिका अध्यक्ष सूर्यप्रसाद सिलवालले जानकारी दिए ।