प्रधानमन्त्रीको टुंगो छैन, माओवादी मन्त्रीको सूची तयार !

३० असार, काठमाडौं । प्रचण्ड कहिले प्रधानमन्त्री बन्ने भन्ने टुंगो लागिसकेको छैन । तर, माओवादी केन्द्रबाट मन्त्री बन्नेहरुको सूची भने तयार भइसकेको छ । कांग्रेससँग मिलेर माओवादी अध्यक्ष प्रचण्डको नेतृत्वमा नयाँ सरकार गठनको रस्साकस्सी चलिरहेका बेला पार्टीबाट मन्त्री बन्नेहरुको प्रस्तावित नामावली प्रचण्ड निवासमा पठाइएको छ ।

माओवादीले मन्त्री बन्नेहरुको सूची तयार पार्ने जिम्मा कृष्णबहादुर महरालाई दिएको थियो । महराले १२ जनाको नामावली प्रचण्डलाई बुझाउँदै त्यसैमध्यबाट छनोट गर्न भनेका छन् । तर, माओवादीले १२ भन्दा कम मन्त्रालय पाउने स्थिति छ ।

प्रभाकरद्वारा मन्त्री पद अस्वीकार

महराले १२ जनाको सूचीमा आफ्नो नाम छुटाएका छैनन् । महराले अर्थ मन्त्रालय सम्हाल्ने चर्चा छ । यो सूचीमा जनार्दन शर्मा ‘प्रभाकर’को नाम पनि राखिए पनि प्रभाकरले अहिले आफू मन्त्री नबन्ने जवाफ प्रचण्डलाई दिएका छन् ।

लाजिम्पाटको सूचीमा प्रभाकरलाई स्थानीय विकास मन्त्रालयको जिम्मा दिने प्रस्ताव गरिएको थियो । प्रभाकर गृह मन्त्रालयका दाबेदार हुन् । नयाँ सत्ता गठबन्धनमा गृह मन्त्रालय कांग्रेसको जिम्मामा परेपछि प्रभाकरले अरु मन्त्रालय नसम्हाल्ने बताएको स्रोतले भन्यो ।

प्रभाकर देउवाको नेतृत्वमा बन्ने सरकारको गृहमन्त्री बन्ने दाउँमा छन् । उनी हाल सार्बजनिक लेखा समितिको सभापति छन् ।

रेखा शर्मालाई दोहोर्‍याउन प्रस्ताव

महराले प्रचण्डलाई बुझाएको सूचीमा रेखा शर्माको नाम पनि छ । शर्मा ओली नेतृत्वको सरकारमा सामान्य प्रशासन मन्त्री थिइन् । सरकारमा उनको काम सन्तोषजनक भएको भन्दै उनलाई फेरि दोहोर्‍याउन प्रस्ताव गरिएको छ ।

शर्माले पूर्वविशिष्ट पदाधिकारीहरुको दोहोरो सुविधा अन्त्य, वर्षौंदेखि हुन नसकेको कर्मचारीहरुको आधिकारिक ट्रेड युनियनको निर्वाचन, नियम विपरित वर्षौंदेखि काजमा बसेका कर्मचारीहरुको काज फिर्ता, नियम विपरितको कर्मचारी सरुवा रोक्का तथा कारबाही, भूकम्प प्रभावित जिल्लाहरुमा कर्मचारीहरु खटाउन सिडिओ कार्यालयलाई अधिकार प्रत्यायोजनलगायतका काम गरेकी थिइन् ।

ओली नेतृत्वको सरकारमा रहँदा राम्रो काम गर्ने मन्त्री भनेर रेखा शर्मा र तत्कालीन वन मन्त्री अग्नि सापकोटाको नाम लिने गरिन्छ  ।

रेखाको विकल्प सीता

महराले मन्त्री बन्नेहरुको सूचीमा रेखा शर्माको नाम समावेश गरे पनि त्यसलाई सच्याउन केही नेताहरुले प्रचण्डलाई दबाव दिएका छन् । रेखालाई फेरि दोहोर्‍याउनुको सट्टा नयाँलाई अवसर दिनुपर्ने तर्क असन्तुष्ट नेताको तर्क छ ।

‘एउटै व्यक्तिलाई पटक-पटक मन्त्री बनाउनुभन्दा नयाँलाई अवसर दिनुपर्छ भन्ने हाम्रो सुझाव हो,’ प्रचण्डलाई आफूले दिएको सुझावबारे ती नेताले अनलाइनखबरसँग भने ।

रेखाको सट्टा सीता नेपालीलाई मन्त्री बनाउन असन्तुष्ट पक्षको मत छ । सीता नेपाली सुर्खेतकी सांसद हुन् । रेखा शर्मा जस्तै उनी पनि समानुपातिक सांसद हुन् ।

माओवादी संसदीय दलकी सचेतक रेखा सामान्य प्रशासन मन्त्री बनेपछि सीतालाई सचेतकको जिम्मेवारी दिइएको छ ।

यसैगरी मधेसी समुदायबाट प्रभु साह र थारु समुदायबाट बुद्धिसागर चौधरीलाई पनि मन्त्री बनाउन प्रस्ताव गरिएको छ । साह हाल व्यवस्थापिका संसदअन्तर्गतको अन्तराष्ट्रिय तथा श्रम समितिको सभापति छन् । यसैगरी चौधरी बर्दियाबाट समानुपातिक सांसद छन् ।