१६ असोज काठमाडौं । दशैंलाई मीठो खाने र राम्रो लगाउने पर्वका रुपमा मनाइन्छ । मांसाहारी वर्गका मानिसले लागि दशैंमा मासुका परिकारको विशेष महत्व दिन्छन् ।
दशैंमा प्रमुख रुपमा खसीबोकाको मासु नै खोज्ने गरिन्छ । मासुका पारखीहरुलाई लक्षित गरी सरकार र ब्यापारीहरुले काठमाडौंमा खसीबोका बिक्रीका लागि ल्याउने गरेका छन् । पछिल्लो समयमा दशैंमा च्याङ्ग्राको मासु खान खोज्नेहरु बढ्दै छन् ।
विगतका वर्षहरुमा जस्तै यस वर्ष पनि नेपाल खाद्य संस्थानले काठमाडौंमा हिमाली च्याङ्ग्रा र तराइका खसी भित्र्याएको छ । र, आजै आइतबारदेखि बिक्री पनि सुरु गरेको छ ।
संस्थानको थापाथलीमा रहेको बाग्मती अञ्चल गोदाम परिसरमा च्याङ्ग्रा र खसीबोका बिक्रीका लागि राखिएका छन् ।
संस्थानले २५ केजीसम्मका खसीबोका प्रतिकेजी ४ सय ४० रुपैयाँ तोकेको छ । २५ केजीभन्दा माथिका खसीबोका प्रतिकेजी ४ सय ५० र च्याङ्ग्रा प्रतिकेजी ६ सय ५० रुपैयाँ मूल्य निर्धारण गरेर विक्री सुरु गरेको हो ।
संस्थानले यो वर्ष १ हजार ५ सय खसीबोका र १ हजार ५ सय च्याङ्ग्रा बिक्री गर्ने बताएको छ । संस्थानले उपभोक्तालाई बिक्री गरेका च्याङग्रा मुस्ताङबाट तथा खसीबोका हेटौंडाबाट ल्याइएका हुन् ।
खसीबोका र च्याङ्ग्रा किन्नेको दिउँसो थापाथलीमा लाइन थियो ।
