८ मंसिर, गोरखा । गोरखाको सिरानचोक गाउँपालिका–७ तल्लो गोहोरेमा भेटिएको सकेट बम र डेटोनेटर डिष्पोज गरिएको छ ।
स्थानीय गणेश कुमार पाण्डेको भत्किएको घरभित्र बोरामा रहेको दुइ वटा सकेट बम र १७ सय ६० थान डेटोनेटर नेपाली सेनाको बम डिष्पोजल टोलीले शुक्रबार डिष्पोज गरेको हो ।
‘बोराभित्र दुई वटा सकेट बम, ३३ नम्बर कमरसियल डेटोनेटर ७९० थान, २७ नम्वर डेटोनेटर ९७० थान र तीन जोर टुपिन प्लग रहेछ,’ सहायक प्रमुख जिल्ला अधिकारी केशवराज शर्माले भने, ‘सबै नेपाली सेनाको टोलीले डिष्पोज गरिसक्यो ।’
बिहीबार स्थानीयले बोराभित्र शंकास्पद वस्तु देखेपछि प्रहरीलाई खबर गरेका थिए ।
२०५६ सालदेखि उक्त घरमा कोही नबस्ने गरेको र उक्त बिष्फोटक पदार्थ तत्कालिन द्वन्द्वको समयमा लुकाएर राखेको हुन सक्ने प्रहरीले अनुमान गरेको छ ।
