५ चैत, काठमाडौं । सशस्त्र प्रहरीमा जागिर लगाइदिन्छु भन्दै रकम असुल्ने युवती पक्राउ परेकी छन् ।
पक्राउ पर्नेमा तारकेश्वर–१०, लोकतान्त्रिक चोक बस्ने २७ वर्षीय मञ्जु बुढाथोकी छन् ।
उनले आफू सशस्त्र प्रहरी वलको प्रहरी सहायक निरीक्षक भएको भन्दै रकम असुल्ने गरेकी थिइन् । प्रलोभनमा पार्न उनले शसस्त्र प्रहरीको पोशाक लगाएको फोटो पनि देखाउने गरेकी थिइन् ।
उनीलाई महानगरीय प्रहरी वृत्त, बालाजुको टोलीले पक्राउ गरी आवश्यक अनुसन्धान थालेको छ ।
प्रारम्भिक अनुसन्धानका क्रममा उनीबाट हालसम्म ५ जना ठगिएको खुलेको छ ।
उनले काठमाडौंको वनस्थलीमा बस्ने राधा शाहीसँग जागिर लगाइदिने भन्दै १ लाख ४५ हजार रुपैयाँ लिएकी थिइन् ।
त्यस्तै, कपन बस्ने रेणुका भण्डारीसँग ५० हजार रुपैयाँ, विमला खड्कासँग १५ हजार, जुनाकुमारी खड्कासँग १२ हजार र मिना सुनुवारसँग १९ हजार रुपैयाँ लिएको काठमाडौं प्रहरी परिसरका प्रवक्ता डिएसपी मोहन थापाले बताए ।
