१९ भदौ, काठमाडौं । काभ्रेका गुण्डानाइके सत्यमान लामा पक्राउ परेका छन् ।
काभ्रेको तिमाल गाउँपालिका-६ का मानबहादुर तामाङ लगायतलाई ज्यान मार्ने धम्की दिएको आरोपमा महानगरीय प्रहरी अपराध महाशाखाले उनलाई मंगलबार काठमाडौंको ठमेलबाट पक्राउ गरेको हो ।
लामाले फोनबाट अश्लिल गालीगलौज गर्दै तामाङलाई हातखुट्टा भाँचिदिने, मार्ने धम्की दिएको आरोपमा उनलाई पक्राउ गरेको महाशाखाले जनाएको छ ।
लामाले तामाङलाई ज्यान मार्ने धम्की दिँदै ‘तँलाई मारेबापत जेलमा बस्न एकजना तयार छ’ भनी धम्की दिएको महाशाखाले बताएको छ । लामा अर्का गुण्डानाइके दावा लामाको सहयोगी भएको प्रहरीको दावी छ ।
