२६ कात्तिक, काठमाडौं । बंगलादेशका अनुभवी ब्याट्सम्यान मुस्फिकर रहिमले दोहोरो शतक बनाएर कीर्तिमान कायम गरेका छन् ।
जिम्बाब्वेविरुद्धको टेष्ट क्रिकेट सिरिजको दोस्रो खेलमा रहिमले दोहोरो शतक प्रहार गरेका हुन् । उनले २ पटक दोहोरो शतक बनाउने पहिलो विकेट किपर ब्याट्सम्यानको कीर्तिमान बनाएका छन् ।
टस जितेर पहिले ब्याटिङ गरेको बंगलादेशका लागि दोस्रो दिन रहिमले दोहोरो शतक पूरा गरेका हुन् । उनले ४०७ बलको सामना गरी १६ चौका र १ छक्का प्रहार गर्दै दोहोरो शतक बनाएका हुन् । उनकै उत्कृष्ट प्रदर्शनमा बंगलादेशले जिम्बाब्वेमाथि पहिलो इनिङ्समै विशाल स्कोर बनाएको छ ।
रहिमले दोहोरो शतक मात्रै बनाएनन्, बंगलादेशका लागि उनले आफ्नो रेकर्ड पनि राखे । टेष्ट क्रिकेटमा २ पटक दोहोरो शतक बनाउने उनी पहिलो खेलाडी समेत बने । उनले यसअघि श्रीलंकासँग सन् २०१३ मार्च ८ तारिखमा टेष्ट क्रिकेटमा दोहोरो शतक बनाएका थिए । त्यसबेला उनले २०० रन बनाउँदै दोहोरो शतक पूरा गरेका थिए ।
