२३ वैशाख, काठमाडौं । घरेलु टोली इंग्ल्यान्डले टी-२० क्रिकेट खेलमा पाकिस्तानलाई पराजित गरेको छ ।
एक खेलको टी-२० क्रिकेट खेलमा पाकिस्तानलाई इंग्ल्यान्डले सात विकेटले पराजित गरेको हो । १७४ रनको लक्ष्य पछ्याउँदै ब्याटिङ गरेको इंग्ल्यान्डले १९.२ ओभरमा तीन विकेटको क्षतिमा लक्ष्य भेटायो ।
इंग्ल्यान्डका लागि कप्तान इओन मोर्गनले अविजित ५७ रन बनाए । उनले २९ बलमा पाँच चौका र तीन छक्का प्रहार गरे । त्यस्तै जोइ रुटले ४७ रन बनाउँदा जोम्स भिन्सले ३६ रन बनाएका थिए ।
सोफिया गार्डेन्समा टस जितेर ब्याटिङ गरेको पाकिस्तानले निर्धारित २० ओभरमा ६ विकेटको क्षतिमा १७३ रन बनाएको थियो । पाकिस्तानका लागि बाब र अजामले ६५ र हरिस सोहइलले ५० रन बनाएका थिए । बलिङतर्फ जोफ्रा अर्चरले दुई विकेट लिए ।
