३ साउन, काठमाडौं । त्रिभुवन विश्वविद्यालय सेवा आयोगको अनियमिततामा मुछिएका पूर्वसह–सचिव रामबहादुर पाण्डेले आत्महत्या गरेका छन् । कानुन व्यवसायीसँग छलफल गरेर फर्किने क्रममा त्रिपुरेश्वरको राधा भवनबाट हामफालेर उनले आत्महत्या गरेका हुन् ।
काठमाडौं प्रहरी परिसर, टेकुका डीएसपी होविन्द्र बोगटीका अनुसार पाण्डेले भवनको पाँचौं तलाबाट बिहीबार दिउँसो हामफालेका थिए । उनीविरुद्ध एक वर्ष जेल सजाय माग दाबी गर्दै अख्तियार दुरुपयोग अनुसन्धान आयोगले मुद्दा दायर गरेको थियो ।
लमजुङ घर भएका पाण्डे पछिल्लो समय कीर्तिपुर बस्दै आएका थिए । उनी प्रेसर र डिप्रेसनको समेत रोगी भएको परिवारलाई उदृत गर्दै प्रहरीले जनाएको छ ।
शुक्रबार पाण्डेको शवलाई पोस्टमार्टम गरिएको छ ।
