११ फागुन, धादिङ । धादिङको बेनिघाट रोराङ गाउँपालिका ९ ज्यामिरेघाटमा ट्रक दुर्घटना हुँदा चालकको मृत्यु भएको छ । दुर्घटनामा मकवानपुरको भैंसे बस्ने ४६ वर्षीय बिखे थोकरको मृत्यु भएको हो ।
थोकरको गजुरी अस्पतालमा उपचारको क्रममा आइतबार बिहान करिब पाँच बजेतिर मृत्यु भएको जिल्ला प्रहरी कार्यालय धादिङका प्रवक्ता रूपक खड्काले जानकारी दिए ।
सिमेन्ट बोकेर वीरगञ्जबाट बनेपा जाँदै गरेको ना ५ ख ३७७७ नम्बरको ट्रक आइतबार बिहान करिब सवा तीन बजे त्रिशुली नदीमा खसेको थियो । टायर पड्किएपछि ट्रक अनियन्त्रित भएर सडकबाट करिब एक सय मिटर तल खसेको प्रहरीले जनाएको छ ।
दुर्घटनामा सहचालक सप्तरीको रुपनगर बस्ने राजेश विक घाइते भएका छन् । उनको गजुरी अस्पतालमा उपचार भइरहेको छ । उनको अवस्था सामान्य रहेको धादिङ प्रहरीले जनाएको छ ।
