२६ चैत, दमक । प्रधानमन्त्री केपी शर्मा ओलीको गृहनगर दमकमा सत्तारूढ नेपाल कम्युनिष्ट पार्टी (नेकपा) को नगर कमिटीले कोरोना रोकथाम एवम् विपन्न समुदायलाई राहत वितरणका लागि गठित नगर समन्वय समितिलाई ३ लाख नगद हस्तान्तरण गरेको छ ।
बिहीबार दमक नगरपालिकामा आयोजित कार्यक्रममा नगर प्रमुख रोमनाथ ओलीलाई नेकपा दमक नगर कमिटीका अध्यक्ष वोधप्रसाद घिमिरेले नगर कमिटीको तर्फबाट ३ लाख एक हजार नगद हस्तान्तरण गरेका हुन् ।
थप ५ लाख रुपैयाँ नेकपाको दमक नगर कमिटीअन्तर्गत नगरका दशवटा वडा कमिटीको तर्फबाट केही दिनमै हस्तान्तरण गरिने नगर सचिव तिर्थराज बस्नेत (शंकर)ले बताए ।
दमक नगरपालिकाको कोरोना भाइरस नियन्त्रण तथा रोकथामका लागि गठित नगर समन्वय समिति कोरोना रोकथाम र विपन्न समुदायको राहतको लागि अहोरात्र क्रियाशील रहेको नगर उपप्रमुख एवम् प्रवक्ता गीता अधिकारीले बताइन् ।
