७ वैशाख, काठमाडौं । कोरोना भाइरसको संक्रमण रोकथाम तथा नियन्त्रणका लागि पाँच हप्तादेखि जारी लकडाउनका कारण घरभित्रै बसिरहन बाध्य स्पेनका बालबालिकाहरु घर बाहिर निस्किन पाउने भएका छन् ।
स्पेन सरकारले २७ अप्रिलदेखि बालबालिकाहरुलाई बाहिर निस्किन दिने भएको हो । प्रधानमन्त्री पेद्रो सान्चेजले २७ अप्रिलदेखि लकडाउन केही खुकुलो बनाउने र बालबालिकाहरुलाई घरबाहिरको ताजा हावा लिन दिने प्रतिबद्धता जनाएका छन् ।
प्रधानमन्त्री सान्चेजले बालबालिकाहरुलाई ताजा हावा लिन दिने भने पनि यससम्बन्धी विस्तृत योजना सार्वजनिक नभएको बीबीसीले जनाएको छ ।
यसअघि बार्सिलोनाकी मेयर एडा कोलाउले बालबालिकाहरुलाई घर बाहिर निस्किन दिन सरकारसँग अपील गरेकी थिइन् । मेयर कोलाउका साना सन्तान छन् ।
स्पेनमा कोरोना भाइरसबाट २० हजार बढीको मृत्यु भइसकेको छ भने झण्डै २ लाख जनामा संक्रमण पुष्टि भएको छ । स्पेनमा शनिबार एकै दिन ५ सय ६५ जनाको मृत्यु भएको छ । केही दिनयता स्पेनमा दैनिक मृत्यु हुनेको संख्या घट्दै गएको छ ।
प्रधानमन्त्री सान्चेजले शनिबारको पत्रकार सम्मेलनमा महामारी नियन्त्रणउन्मुख भएको बताएका छन् । तर पनि जोखिम अझै नटरेको उनको भनाइ छ ।
