२१ असार, काठमाडौं । नयाँ बसपार्कस्थित एक ग्यारेजमा राखिएका ८ वटा माइक्रो बसमा आगजनी भएको छ । लकडाउनका कारण सञ्चालनमा आउन नसकी ग्यारेजमा थन्काइएका ८ वटा नयाँ माइक्रोमा आगजनी भएको प्रहरीले जनाएको छ ।
महानगरीय प्रहरी वृत्त, महाराजगञ्जका डीएसपी रोशन खड्काले प्राविधिक कारणले आगलागी भएको हुन सक्ने अनलाइनखबरलाई बताए । यद्यपि, विस्तृत अनुसन्धान भइरहेको उनले जनाए ।
प्रहरीका अनुसार अनुसन्धानका लागि अपराध महाशाखाको टोलीलाई पनि परिचालन गरिएको छ । आगलागीमा परेकामध्ये दुईवटा पुरानो र ६ वटा नयाँ माइक्रो रहेका छन् ।
प्रहरीका अनुसार बा १ ज ९६०९, बा २ ख २०८०, बा १ ज ९४५८, बा २ ज १०९६, बा ३ ख ८५८९, बा ४ ख २४०, बा ४ ख ४०९ र ग १ ख २४४६ नम्बरको माइक्रो जलेका छन् । पुरानो माइक्रोबाट आगलागी सुरु भएको थियो ।
